Баянхонгор аймгаас өвчтөн тээвэрлэж явсан түргэн тусламжийн машин хот хоорондын автобустай мөргөлдөж, эмч, жолооч нарын 6 хүн амиа алдсан харамсалтай осол энэ сарын 11-ний өдөр гарсан.

Тэгвэл энэ талаар нэгэн иргэн М.Түвшинжаргал өөрийн цахим хуудаснаа "Сэтгэл эмзэглүүлсэн эмгэнэлт мэдээ, цочирдмоор зураг сошиал сүлжээгээр сайт болгон цацаж байх юм. Төрж өссөн аймаг, нутгийн маань зураг хаалган дээрээ наасан эвдэрхий түргэний тэрэг. Зам дээр хэвтэх хүчилтөрөгчийн хоёрын хоёр баллон. Хоёрын хоёр хүнд баллоноор хүчилтөрөгч дүүргээд гарсныг бодоход их л хүнд хүмүүс тээвэрлэж явж дээ. Хармааргүй байсан ч дахиж хараад тэр зураг дундаас ямар нэг юм хайх шиг, амьдын цогийн өчүүхэн зүйл эрэх шиг.

Түргэний жолоочийн буруу байсан юм шиг мэдээг хаалтын гэрээтэй сайтууд цацаж байна. Ажлын гараагаа төрж өссөн нутаг Баянхонгор аймгийн нэгдсэн эмнэлэгт түргэн тусламжийн эмчээр эхлүүлж байсны хувьд эрүүл мэндийн салбарын ажилчид, эмч, жолооч нарын хүнд хэцүү ажлын зах хагасаас мэдэрсний хувьд үнэхээр эмзэглэлээ.

Аймгийн төв дотор л өвдөж зовсон хүн тээвэрлэх хэцүү байдаг. 600 гаруй километр хол замд, цагийн давчуу, цас мөсний хэцүүд яаж яарч сандарч явсан бол доо. Өвдөж зовсон хүний ёолох дуу, ар гэрийнхний аргаа барсан харц, тэдэнд туслах гэж хичээн чадах бүхнээ тэмтчиж байгаа эмч, цаг хугацаатай уралдахын тулд жолоогоо барин сандарч яваа жолооч залуу нүдэнд харагдах шиг. Үнэхээр харамсалтай. Хажууд нь байсан юм шиг худлаа ярьдаг, харсан юм шиг дүгнэлт гаргадаг новшнууд л олон болж дээ..." хэмээжээ.