Өнөөдөр УЕПГ, НПГ-аас хамтарч, хэвлэлийн бага хурал хийлээ.

2023 оны нэгдүгээр сард Дүнжингаравын уулзварт шингэрүүлсэн хий тээвэрлэж явсан “Дашваанжил” ХХК-ийн хүнд даацын автомашины жолооч, “Патрол” маркийн автомашины жолооч нар зам тээврийн осол гаргасан.

Ослын улмаас дэлбэрэлт болж тэр хавьд явганаар, автомашинаар зорчиж явсан 7 хүн нас барж, тэнд байрлах 207 дугаар байр дэлбэрэлтэд өртсөн.

Улмаар  тус дэлбэрэлтэд "Дашваанжил" ХХК-ийн захирал болон жолооч Ч.Ренцэндорж нарт яллах дүгнэлт үйлдэн, шүүхэд шилжүүлсэн талаар өмнө бид мэдээлсэн.

Тэгвэл Дүнжингаравын уулзварт гарсан дэлбэрэлтэд “Патрол” маркийн автомашины жолоочийг буруугүй гэж үзжээ.

Энэ талаар  НПГ-аас "Уг дэлбэрэлтийн хэрэгт мөрдөн шалгах ажиллагаанд 8 төрлийн 98 шинжээчийн дүгнэлт гарсан. Техникийн шинжээчийн дүгнэлтээр “Патрол” маркийн автомашины буруутай үйл ажиллагаа байхгүй байсан. Харин “Дашваанжил” ХХК-ийн хөдөлмөрийн аюулгүй ажиллагаатай холбоотой уг осол гарсан гэж үзэн Шүүхэд шилжүүлсэн" гэв.

Эргэн сануулахад,  Nissan Patrol маркийн автомашины жолооч нь БХЯ-ны Барилга захиалагчийн алба Төрийн Өмчит Аж Ахуйн тооцоот Үйлдвэрийн газрын захирал Э.Мөнхнаран болохыг эх сурвалжууд мэдээлсэн. Тухайн үед Э.Мөнхнаран нь яамны нэр дээр бүртгэлтэй тээврийн хэрэгслийг ажлын бус цагаар яагаад унаж явав гэгчлэнгийн олон асуулт хариултаа нэхэж байв.