Өмгөөлөгч Г.Батбаяр агсны охин Б.Ариунзаяа нь бусдын толгой дээр халуун кофе асгаж, танхайрсан хэрэгт холбогдож,  "бусдын биед хохирол учруулсан" гэх хэрэгт холбогдуулан яллагдагчаар татагдаж байсан талаар өмнө бид мэдээлж байсан.  Тодруулбал, Б.Ариунзаяа нь "Над руу харлаа, намайг таньдаг юм уу" гэж гартаа барьж  явсан  халуун кофег бусдын толгой дээр асгаж, биед нь халдаж гэмтэл учруулсан хэрэг гарсан.

Гэтэл шүүхийн шийдвэр нь гарчихаад байхад  Б.Ариунзаяа нь удаа дараа цахим сүлжээнд пост оруулж, хохирогч талынхан надаас "мөнгө нэхсэн" гэх зэргээр хохирсон охины арга гэрийнхнийг шантаажилж эхэлжээ.

Тэрээр энэ талаар зарим хэвлэлд ярилцлага өгөхдөө, "Миний халдсан гээд байгаа тэр охин ээж, эгчтэйгээ нийлж шантаажилж байгаад надаас 10 сая төгрөг авсан." гэжээ.

Тэгвэл Б.Ариунзаяад толгой дээрээ халуун кофе асгуулж ХОХИРСОН ОХИНЫ АР ГЭРЭЭС "Манай гэр бүл Б.Ариунзаяагаас эмчилгээний төлбөр хохирлын мөнгө гэж "нэг ч төгрөг" нэхэмжилж аваагүй. Тус хэрэг  2024.03.07-нд шүүхийн шийдвэр гарч буруутай нь тогтоогдож хэрэг нь хаагдсан болно.

Гэвч элдэв гүтгэлэгийн шинжтэй стори, пост байнга инстаграм болон фэйсбүүкдээ оруулж , манай охиныг зохион байгуулалттай өдөж кофе асгуулсан мэтээр  сошиалаар тарааж, олныг төөрөгдүүлсэн мэдээлэл одоог хүртэл тасрахгүй байгаад манай гэр бүл маш их гомдолтой байна.

Бид зүгээр л тайван амьдармаар байна. Мөн сүүлийн хэд хоног яваад байгаа шантаажилж мөнгө авсан гэх хэрэгт олон нийтэд биднийг мөнгө авсан мэт ойлголт төрүүлж элдэв хэл ам гүтгэлэг хэрээс хэтэрлээ. Тиймээс энэ талаар тодорхой тайлбар хийж,  мөн бие болон сэтгэл санааны хямралд оруулж одоог хүртэл тайван байж чадахгүй байгаа охин болон манай гэр бүлээс уучлалт гуйхыг шаардаж байна. Хэрэв гүтгэлэг мэдээллээ зогсохгүй бол  шүүхээр олгогдсон эрхийн дагуу хохирол нэхэмжлэх эрх хэзээд нээлттэй үлдсэнийг анхааруулмаар байна" гэв.