Цагдаа, Дотоодын цэргийн байгууллагын 2025 оны удирдах ажилтны нэгдсэн зөвлөгөөн өнөөдөр буюу 2025 оны нэгдүгээр сарын 23-ны өдөр эхэллээ.

ЦЕГ-ын дэд бөгөөд Стратеги, бодлого, инновац, хөгжлийн албаны дарга О.Ганбат: 

Цагдаа, дотоодын цэргийн байгууллагаас 2025 онд “Хамтдаа хөгжье” уриалгын дор  Хүний эрх, Аюулгүй орчин, Мэргэшсэн алба хаагч, Тогтвортой, шуурхай ажиллагаа, Алба хаагчийн эрх ашиг, эрүүл мэнд, Харилцаа, хандлага, бүтээлч сэтгэлгээг хөгжүүлэх зэрэг чиглэлд онцгой анхаарах зорилтыг дэвшүүлсэн.

Мөн Монгол Улсын урт хугацааны хөгжлийн бодлого Алсын хараа-2050, Монгол Улсыг хөгжүүлэх таван жилийн үндсэн чиглэлтэй уялдуулан Цагдаа, дотоодын цэргийн байгууллагын 2025-2028 онд хэрэгжүүлэх Стратеги төлөвлөгөөгөө боловсруулж байна. 

Цагдаагийн ерөнхий газар нь 2025 онд Засгийн газрын Хяналт хэрэгжүүлэх газар, Хууль зүй, дотоод хэргийн яамтай хамтран хийх онцлог ажлуудын нэг нь байгууллагын  чиг үүргийн давхардал арилгах, ажлын ачаалал тэнцвэржүүлэх бүтээмжийг нэмэгдүүлэх зорилгын хүрээнд “Процессын дахин инженерчлэл”-ийн  хэрэгжүүлэх юм.

Мөн энэ ажлын хүрээнд төр төвтэй, процесс төвтэй бус “ХҮН ТӨВ”-тэй ажил, төрийн үйлчилгээ үзүүлэхэд онцгой  анхаарал хандуулан ажиллаж байна.

Дэлхийн зарим улс орны төрийн процессын дахин инженерчлэл амжилтгүй болсон тохиолдол байдаг. Үүний шалтгаан, нөхцөл  нь “удирдлагын манлайлал дутмаг, өөрчлөлтөөс зайлсхийх хандлага, салбар, нэгжийн уялдаа холбоо муу, үйл ажиллагааны нэгдсэн стандартгүй” зэрэг бэрхшээл байсан.

Иймд өнөөдөр цагдаа, дотоодын цэргийн байгууллагын Удирдах ажилтны сургалт, зөвлөгөөний үеэр “Процессын дахин инженерчлэл”-ийн  хүрээнд хийх бодлогын шинжтэй ажлын талаар удирдах ажилтнууд нэгдсэн ойлголтод хүрэх нь түүний хэрэгжилтийг хангахад чухал нөлөөтэй.

Дээрх ажлыг хийснээр Цагдаа, дотоодын цэргийн байгууллагын ажил, үйлчилгээний чанар, хүртээмжийг нэмэгдүүлэх, шийдвэр гаргалт оновчтой болох, хүнд сурталгүй, түргэн шуурхай, үр ашигтай байх, эрсдэлт нөхцөл байдлыг урьдчилан харах, эрх зүйн зохицуулалт, зохион байгуулалтын арга хэмжээг угтуулан авах шийдлүүдийг нэвтрүүлж эерэг үр дүн гарна гэж тооцож байна.

Жишээлбэл: Судалгаа, дүн шинжилгээний үндсэн дээр хүн амын өсөлт, нягтаршил, ойрын ирээдүйд үйлдэгдэх шинэ төрлийн гэмт хэргийн төсөөллийг гаргаж урьдчилан сэргийлэх ажлыг оновчтой төлөвлөх, шинээр нутаг дэвсгэр хариуцсан болон тухайн төрлийн гэмт хэрэгтэй тэмцэх цагдаагийн байгууллагын тусгайлсан нэгжийг байгуулах зэрэг арга хэмжээг авах юм. 

Тиймээс бид нэгдсэн стратеги, бодлоготой, олон нийтийн хамтын ажиллагаанд тулгуурлах, шинэ технологи, инновацын шийдлүүдийг нэвтрүүлэх, цахим шилжилт хийх, гэмт хэргийн илрүүлэх, урьдчилан сэргийлэх ажил, цагдаагийн байгууллагаас үзүүлж буй төрийн үйлчилгээний чанар, үр дүнг сайжруулж алба, нэгжүүдийн уялдааг ханган ажилласанаар, цагдаа, дотоодын цэргийн байгууллагын үйл ажиллагаанд дэвшил авчрах бүрэн боломжтой.