Цагдаа, Дотоодын цэргийн анги байгууллагын удирдах ажилтны зөвлөгөөн өнөөдөр (2024.01.23)  эхэллээ.

Энэ удаагийн удирдах ажилтны зөвлөгөөнийг “Хамтдаа хөгжье” зорилтын хүрээнд зохион байгуулж байгаа бөгөөд зөвлөгөөнд 300 гаруй удирдах албан тушаалтнууд оролцож байна.

2025 оны Удирдах ажилтны зөвлөгөөнийг нээж, ЦЕГ-ын дарга, Дотоодын цэргийн командлагч, бригадын генерал Т.Сүхболд нийт удирдах ажилтнууд, бие бүрэлдэхүүнд хандан энэ онд хүрэх үр дүн, хэрэгжүүлэх ажил, зорилтуудыг танилцууллаа.

Энэ үеэр Гадаад харилцааны сайд Б.Батцэцэг хэлсэн үгэндээ "Цагдаа, дотоодын цэргийн байгууллагын удирдах ажилтны зөвлөгөөнд анх удаа оролцож,  цагдаагийн байгууллагаас хийж хэрэгжүүлж буй ажил, цаашид хэрэгжүүлэх зорилтуудтай танилцлаа.

Бүхий л салбарын гадаад харилцаа маш чухал байдаг. Цагдаагийн байгууллага үеийн үед гадаад харилцаагаа хөгжүүлэх, алба хаагчдаа чадавхжуулах тал дээр анхаарч ажиллаж ирсэн. Үүний үр дүнд эрх зүйн орчин бүрдэхээс гадна Монгол Улсын нэрийн хуудас болсон энхийг сахиулах үйл ажиллагаанд амжилттай хамрагдаж байна. Гадаад харилцааны яамнаас энхийг сахиулах үйл ажиллагаанд хамрагдах цагдаагийн алба хаагчдын орон тоог нэмэгдүүлэх тал дээр анхаарч ажиллаж байна. Үүнээс гадна цагдаагийн алба хаагчдыг гадны улс оронд сургах, чадавхжуулах ажлыг цаашид тогтмол зохион байгуулна." гэдгийг онцоллоо. 

Цагдаа, дотоодын цэргийн байгууллагаас 2025 онд “Хамтдаа хөгжье” уриалгын дор  Хүний эрх, Аюулгүй орчин, Мэргэшсэн алба хаагч, Тогтвортой, шуурхай ажиллагаа, Алба хаагчийн эрх ашиг, эрүүл мэнд, Харилцаа, хандлага, бүтээлч сэтгэлгээг хөгжүүлэх зэрэг чиглэлд онцгой анхаарах зорилтыг дэвшүүлсэн аж.