Нэгдсэн Үндэстний байгууллагын Гэмт хэрэг, хар тамхитай тэмцэх албаны Зүүн өмнөд Ази, Номхон далайн бүс хариуцсан газрын захирал Монгол Улсад албан ёсны айлчлал хийж байна.

Цагдаагийн Ерөнхий газрын Тэргүүн дэд дарга, бригадын генерал Ц.Ням-Очир, Гадаад харилцаа, энхийг сахиулах ажиллагааны хэлтсийн дарга, цагдаагийн хурандаа Б.Эрдэнэдалай нар ноён Масуд Каримипур, Монгол Улсын “Хууль сахиулах байгууллагын гэмт хэрэгтэй тэмцэх чадавх нэмэгдүүлэх” төслийн ерөнхий зохицуулагч, ноён Лонг Нгуен, хөтөлбөрийн үндэсний зөвлөх Г.Бадарч нарыг энэ оны 11-р сарын 21-ний өдөр хүлээн авч уулзалт хийлээ.

Уг уулзалтын үеэр ноён Масуд Каримипур цагдаагийн байгууллагаас цахим орчинд үйлдэгдэж буй гэмт хэрэгтэй тэмцэх чиглэлээр авч хэрэгжүүлж буй ажил арга хэмжээг өндрөөр үнэлж, цахим орчинд үйлдэгдсэн залилах гэмт хэргийн хохирогчдын зөрчигдсөн эрхийг сэргээх, хохирлыг нэн даруй нөхөн төлүүлэх зорилготой "Кибер гэмт хэрэгтэй тэмцэх төв"-ийг байгуулсан нь бусад оронд тэргүүн туршлага болохуйц арга хэмжээ болсон талаар онцолсон юм.

Түүнчлэн цаашид алба хаагчдыг мэргэшүүлэх, сурган дадлагажуулах, туршлага судлах, дэвшилтэт техник, технологийг нэвтрүүлэх замаар үндэстэн дамнасан зохион байгуулалттай гэмт хэрэг, ялангуяа цахим орчинд үйлдэгдэж буй болон хар тамхи, хүн худалдаалах, санхүүгийн гэмт хэрэгтэй тэмцэх чадавхыг нэмэгдүүлэх чиглэлээр хамтын ажиллагааг эрчимжүүлж, хамтран ажиллах талаар харилцан санал солилцлоо.

Нэгдсэн Үндэстний Байгууллагын Гэмт хэрэг, хар тамхитай тэмцэх алба 2024 оны 05 дугаар сард Монгол Улсад албан ёсоор төлөөлөгчийн газрыг нээж АНУ-ын Төрийн департментын Мансууруулах бодис, хууль сахиулах асуудал эрхэлсэн олон улсын товчооны дэмжлэгтэйгээр манай улсад эхний төслийг хэрэгжүүлж байна.