Энэ сарын 1-нээс эхлэн Замын-Үүд, Эрээн боомтын ачаа тээврийн хэсэг 24 цагаар ажиллаж эхэлсэн. Ингэж ажилласнаас тус боомтоор 1,487 автомашин нэвтрээд байна. 

Дорноговь аймаг дахь Хилийн боомтын захиргааны дарга Б.Баярнямын мэдээлснээр энэхүү өөрчлөлт эхэлснээс хойших гурван хоногийн хугацаанд гарах чиглэлд 721, орох чиглэлд 766 автомашин нэвтрээд байгаа аж. 

24 цагийн горимд шилжсэнээр ачаалал ихтэй оргил цагаар том оврын автомашины дараалал багасаад зогсохгүй тээвэрчдийн цагийг хэмнэх, буудал, хоол, тээврийн хэрэгслийн хоногийн хураамж зэрэг зардлыг бууруулах, бараа бүтээгдэхүүний үнэ тогтворжих зэрэг олон талт ач холбогдолтой юм.