Эх хүүхдийн эрүүл мэндийн тусламж, үйлчилгээг чанартай хүргэх зорилгоор Эх Хүүхдийн Эрүүл Мэндийн Үндэсний төв нь их бүтээн байгуулалтын ажлыг эхлүүлээд байна. Тэд өнгөрсөн онд Эх барих эмэгтэйчүүдийн эмнэлгийн Төрөх өрөө, Төрсний дараах тасаг, Хүүхдийн эмнэлгийн Мэс заслын тасагтаа иж бүрэн засвар хийхээс гадна, Үргүйдлийн төвтэй болсон. Үргэлжлүүлэн Нөхөн үржихүйн зөвлөх Поликлиник Перинаталогийн төвийн барилгын явц 90 хувьтай байгаа бол ажилчдын хүүхдийн цэцэрлэгийн барилгын ажил ид явагдаж байна. 

Тэгвэл бид энэ удаад ЭХЭМҮТ-ийн Төрөх тасгийг онцолж байна.

Тус тасгийн эрхлэгч Ц.Мөнхнасан дурдахдаа "2022 оноос өмнө ЭХЭМҮТ-ийн Төрөх өрөө нь стандарт найман өрөөтэйгөөр үйл ажиллагаа явуулдаг байсан. Өөрөөр хэлбэл нэг төрөх өрөөнд 2-3 эх төрдөг байсан гэсэн үг. Тэгвэл 35 жилийн дараа буюу 2022 онд анх удаа иж бүрэн засвар хийгдэж, стандарт дөрвөн өрөөнөөс гадна VIP буюу туслагч оруулдаг 10 өрөөтэй болсон. 

Ээжүүд энэ өрөөндөө нөхөр, ар гэрийнхнээсээ оруулаад энэ өрөөндөө төрдөг болсон. Тус засвар хийгдсэнээс хойш төрсөн ээжүүд болон ар гэрийнхнээс маш их талархлын үг ирдэг болсон. 

Манай тасагт хөдөө орон нутгаас эхчүүд их ирж төрдөг. Эдгээр ээжүүд маань стандарт өрөөнд төрж болно. 

Үүнээс гадна манайд төрсөн бүх ээжүүддээ халуун шөлөөр үйлчилдэг болсон. 

Манай тасаг 30 гаруй эмч, мэргэжилтнүүдийн бүрэлдэхүүнтэй ажилладаг. Таван эмч, 16 эх баригч, 10 гаруй үйлчлэгч ажилладаг. 

Тасгийн засварыг хийхдээ хүчилтөрөгчийн ханын системийг байрлуулахаас гадна төрсөн эх эмч, эх баригч нарыг дууддаг дуудлагын системийг суурилуулсан.

Цаашид бид эх, нярай хоёрыг алдаа эндэгдэлгүй уулзуулах, үйлчлүүлэгчид тав тухтай орчинд үйлчлэх зорилт тавин ажиллаж байна." хэмээлээ.