ЗГХА Ойн газраас сумын болон сум дундын ойн ангийн 30 инженер, техникч, ойн хөнөөлт шавж, өвчний судалгаа, тэмцлийн ажил гүйцэтгэдэг ойн мэргэжлийн байгууллагын 15 инженер, техникийн ажилчдыг тус тус “Earthranger” программын сургалтад хамруулж байгаа. Өчигдөр танхимын сургалтад хамрагдсан мэргэжилнүүд өнөөдөр хотын ногоон бүсэд хээрийн дадлага хийлээ.

Олон улсад практик туршлагаар батлагдсан шилдэг арга, техник технологийг нэвтрүүлэн ашиглах зорилгоор хиймэл оюун ухаанд суурилсан “EarthRanger” программыг хөнөөлт шавжийн тэмцлийн ажлын үр дүнг нэмэгдүүлж, тогтвортой менежментийг хэрэгжүүлэх чиглэлээр хөгжүүлэн ажиллаж байна. “EarthRanger” гэдэг нь тухайн газар нутгийг хадгалах, хамгаалахад шаардлагатай мэдээллийг цаг алдалгүй хуваалцах, мэдээллийн дүрслэл, дүн шинжилгээ хийх чадвартай хиймэл оюун ухаанд суурилсан программ хангамж юм.

Төр, хувийн хэвшлийн хамтын ажиллагааны хүрээнд ЗГХА Ойн газар, Рио Тинто Монгол ХХК, Олон улсын байгаль хамгаалах нийгэмлэг хамтран 2023 оноос эхлэн ойн хөнөөлт шавжтай тэмцэх, ойн тогтвортой менежмент хэрэгжүүлэх, чадавхыг бэхжүүлэх чиглэлээр “Эрүүл ой” төслийг хэрэгжүүлж байна.