Дотоодын цэргийн 05-р ангид энэ сарын 9-ны өдөр буюу өчигдөр тус ангид хугацаат цэргийн албаа хааж байсан цэрэг өндрөөс унаж бэртсэн талаар бид өмнө мэдээлсэн.

Тус асуудлын талаар Дотоодын цэргийн штабаас мэдээлэл өглөө.

05-р ангийн захирагчийн орлогч Дэд хурандаа Д.Отгонбаатар "Хугацаат цэргийн албаны байлдагч өглөө хоолонд орох үедээ халуураад байна гэх шалтгаанаар цэргийн байрандаа үлдсэн. Улмаар цэргийн байрныхаа зүүн хойд хэсэгт өндрөөс унасан байдалтай олдсон.

Байлдагчийг олсон даруйдаа анхан шатны тусламж үзүүлж, Гэмтлийн согог судлалын үндэсний төвд хүргэсэн. Одоогийн байдлаар биеийн байдал нь хүнд байна. 

Болсон үйл явдлын талаарх камерын бичлэгт үлдсэн бодит мэдээллийг хүргэхэд тухайн хугацаат цэргийн алба хаагч нь цэргийн байрны гурван давхарт байрладаг ба тус давхрын сургалтын танхимын цонхоор үсэрсэн нь камерын бичлэгээр тогтоогдсон" гэв. 

Үүссэн нөхцөл байдалтай холбоотойгоор цагдаагийн байгууллагаас мөрдөн шалгах ажиллагааг эхлүүлээд байгаа аж. Мөн тус ангид Цагдаагийн ерөнхий газрын дотоод хяналт аюулгүй байдлын хэлтэс, Дотоодын цэргийн штабын дотоод хяналтын хэлтсээс хамтарсан албаны шалгалтыг зохион байгуулж байгаа юм байна. 

Цэргийн анги болон Дотоодын цэргийн штабын зүгээс эмнэлгийн байгууллагуудтай хамтран алба хаагчийн эмчилгээтэй холбоотой бүхий л дэмжлэг туслалцааг үзүүлж, ар гэртэй нь байнгын харилцаа холбоотой байгаа гэдгийг албаныхан мэдээллээ.