Бага насны хүүхдийг цагдаагийн дүрэмт хувцас өмссөн этгээд хулгайлахыг завдсан талаар нэгэн иргэний сэрэмжлүүлэг мэдээлэл өчигдөр /2023.10.03/ орой цахим хуудаст нийтлэгдсэн. Тус мэдээллийн дагуу тухайн иргэнтэй холбогдож, тодрууллаа.

Иргэн Б.МЯГМАРЖИН "Найман настай хүү маань байрныхаа гадна тоглоомын талбай дээр тоглож байхад энэ асуудал гарсан. Өчигдөр 16:00-17:00 цагийн үед Хан-Уул дүүргийн 25 дугаар хороон дахь орон сууцны дунд байдаг тоглоомын талбай дээр хүүхдүүд тоглож байхад цагдаагийн хувцастай залуу хүүд минь чихэр өгье, хамт явья гэж гарнаас нь чирсэн байна лээ.

Олон минут хүүг минь ээрч, чирсэн болохыг СӨХ-ны камерын бичлэгээс үзсэн.

Хүү минь маш их айж, гэр рүүгээ гүйж орж ирж хэлсэн. Хэлсэн даруйд нь би цагдаагийн байгууллагад дуудлага өгч, камер шүүсэн байгаа. Нийт цаг гаруй хугацааны бичлэгт тухайн цагдаагийн хувцастай этгээд нэг залуутай хамт хүүхдүүдийг авч явах талаар ярьсан нь яриа, төрхтэйгөө үлдсэн байна лээ.

Цагдаад мэдүүлэг өгч, хавсралтаар камерын бичлэг, зургийг явуулсан.

Миний хүүг бас нэг хүүхэдтэй хамт авч явахыг завдсан. Цагдаагаас тухайн этгээдийг мөрдөсгүй хувцас өмссөн, цагдаагийн алба хаагч биш гэдгийг хэлсэн. Мөн яаралтай эрэн хайж олно гэсэн байгаа.

Хүү минь сэтгэл санааны хувьд тогтворгүй, айж цочирдсон байдалтай байна." гэв.