Өнгөрөгч наймдугаар сарыг 05-06-нд шилжих шөнө өрх толгойлсон 30 настай СМ.Алунгуа автомашины осолд орж, амь насаа алдсан. Улмаар талийгаачийн цогцосноос зарим эд, эрхтнийг нь авахыг гэр бүлийн гишүүд нь зөвшөөрсөн болов ч зөвшөөрснөөс бусад эрхтнийг нь авсан байсан талаар мөн талийгаачийн амь насыг хохироосон жолооч оршуулгын зардал хийгээд бусад мөнгөн тусламжийг үзүүлээгүй гэж ар гэрийнхэн нь Zarig.mn сайтад мэдээлсэн юм.

Тэгвэл өнөөдөр талийгаач С.Алунгуаг дайрч амь насыг нь хохироосон жолоочийн өмгөөлөгч Х.Ундрах-Оргил мэдээлэл хийлээ. Тэрбээр, "Сэтгүүлч Н.Өнөрцэцэгийн ярьж байгаа зүйлд худал зүйл их байна. Өмгөөлөгч болон миний үйлчлүүлэгчийг худал гүтгэсэн. 2023 оны 08 дугаар сарын 05-06-нд шилжих шөнө болсон зам тээврийн ослын улмаас С.Алунгуа амь насаа алдсан. 

Үүнээс хойш миний үйлчлүүлэгч хууль зүйн туслалцаа авахаар надад хандсаны дагуу ТЦА-ны мөрдөгчтэй очиж уулзсан. Гурван удаа мөрдөгчтэй уулзахдаа хэргийн нөхцөл байдлын талаар, хэрэгт холбогдсон үйлчлүүлэгчээс мэдүүлэг авна гэсэн учраас, хэрэг хянан шийдвэрлэх ажиллагаатай холбоотойгоор гарсан дүгнэлтүүдтэй танилцах зорилгоор л уулзсан. 

Сэтгүүлч Н.Өнөрцэцэг миний үйлчлүүлэгчийг талийгаачийн ар гэрт мөнгөн тусламж үзүүлээгүй, оршуулгын зардалд 100 төгрөг ч өгөхгүй гэсэн гэж ярьсан.

Үйлчлүүлэгч маань зам тээврийн осол гарснаас хойш мэдээлэл нийтэд ил болох хүртэл талийгаачийн ар гэртэй байнга очиж уулзаж байсан. Ингэхдээ өмгөөлөгчтэйгээ ярилцаж, оршуулгын зардал болон хүүхдүүдэд мөнгөн тусламж үзүүлэх нь зөв гэж үзэн 10 сая төгрөг бэлдсэн байсан.

Мөн асран хамгаалагчид эмгэнэл илэрхийлж, үйлчлүүлэгч маань "10 сая төгрөг өгье" гэж хэлсэн ч авахгүй гэсэн. Тэгээд танд ямар санал байна гэтэл хүүхдийн тэтгэмж болон хашаа, байшин авна гэж хэлсэн. Мөн үйлчлүүлэгчийг маань дарамталж 30 сая төгрөг өгөхийг шаардсан. Одоогоор хэрэг шалгагдаж байгаа.

Талийгаач нь тухайн өдөр Фэйсбүүкийн шинэ найзуудтайгаа уулзаж, архидан согтуурч байгаад гарахдаа гарцгүй газраар зам хөндлөн гүйж, осолд орсон" гэв.