"Хэрүүл хийлээ" гэх шалтгаанаар төрсөн эцгээ хутгалж ам насыг нь хохироосон этгээд шүүхээс 12 жилийн  ял сонсжээ.

Тодруулбал, 2023 оны 02 дугаар сарын 13-ны өдөр Э.О нь хохирогч болох  өөрийн төрсөн эцэгтэйгээ маргалдаж, улмаар түүний хэвлий тус газар нь хутгалж амь насыг нь хохироосон хэрэг гарчээ. 

Сонгинохайрхан дүүргийн прокурорын газраас: Э.О-ын үйлдлийг Эрүүгийн хуулийн тусгай ангийн 10.1 дүгээр зүйлийн 1 дэх хэсэгт зааснаар зүйлчлэн яллах дүгнэлт үйлдэж, хэргийг шүүхэд шилжүүлжээ.

Анхан шатны шүүх шүүгдэгч Э.О-ын хүнийг алах гэмт хэрэг үйлдсэн гэм буруутайд тооцож, Эрүүгийн хуулийн тусгай ангийн 10.1 дүгээр зүйлийн 1 дэх хэсэгт зааснаар 12 жилийн хугацаагаар хорих ял шийтгэжээ. Гэтэл тухайн этгээд "ял хүндэдсэн" гэж үзэн давж заалдсан.

Давж заалдах гомдол гаргасан тайлбартаа: “...анхан шатны шүүхийн шийтгэх тогтоолд өөрчлөлт оруулж, оногдуулсан хорих ялыг хөнгөрүүлж өгнө үү. Нэмж хэлэх тайлбаргүй. ...” гэжээ. Харин тухайн этгээдийн  өмгөөлөгч нь шүүх хуралдаанд гаргасан тайлбартаа: “... Миний үйлчлүүлэгч нь анх удаа гэмт хэрэгт холбогдож, ял шийтгүүлсэн. Гэм буруу дээрээ маргадаггүй. Хийсэн үйлдэлдээ маш их харамсаж байгаа.  Иймд дээрх нөхцөл байдлуудыг харгалзан анхан шатны шүүхээс  оногдуулсан 12 жилийн хорих ялын хугацааг багасгаж өгнө үү. ...” гэжээ.

Улмаар Давж заалдах шатны шүүхээс шүүгдэгч Э.О-ын  гаргасан давж заалдах гомдлыг хэрэгсэхгүй болгож, анхан шатны шийдвэрийг хэвээр үлдээж, хэргийг шийдвэрлэжээ.