Наадамчдын гудамжнаас баруун үйлдвэрийн гудамж хүртэлх буюу бидний хэлж заншсанаар Мишээлийн уулзвараас Говийн зам хүртэлх замын ажил "Эрэл" ХХК-иас болоод зогсонги байдалд ороод байна.

Бид энэ талаар тус замын барилгын ажлыг гүйцэтгэж буй "Тотал Инж" ХК-ий Гүйцэтгэх захирал Н.Анхбаяраас тодруулахад тэрээр "Замын ажил 2022 оны 04 дүгээр сарын 16-ны өдөр гэрээ байгуулагдаад ажилд эхэлсэн боловч газар чөлөөлөлтийн асуудалтай холбоотойгоор эхлэх хугацаа хойшилсоор яваад тус оныхоо 07 дугаар сарын 16-ны өдөр ажил эхэлсэн. Манай энэ замын барилга хийж байгаа нэгж газарт нийт газар чөлөөлөлтөд орох 16 ААН, иргэн байсан. Өнгөрсөн жилийн хувьд бид газар чөлөөлөлт нь хийгдсэн боломжтой газрууддаа замын ажлаа хийгээд явсан. Энэ жил 06 дугаар сарын 16-ны өдрөөс ажил эхэлсэн.

Газар чөлөөлөлтөд орсон томоохон ААН болох Говь ХК, Петровис, Ариун гэх мэт компаниуд замын ажлыг хийлгэхээр газраа чөлөөлж өгсөн. Гэтэл одоо Эрэл ХХК газраа чөлөөлж өгөхгүй байгаагаас үүдэн замын ажил бүрэн зогсоод байна.

Эрэл компаний хувьд хуучин хойгуураа төмөр зам байсныг өөрсдийн газар дээр бүртгүүлж, үүгээрээ ачаагаа зөөдөг гэсэн байсан. Тэр төмөр замыг харахад ашигладаггүй нь тогтоосон гэсэн. 

Нийслэлийн Газрын албанаас Эрэл ХК-д мэдэгдэх хуудас байнга өгдөг байсан ч тухайн компанийхан буцаж хариу өгөлгүй өнөөдрийг хүрсэн гэсэн.

Уг нь албадан газар чөлөөлөх Нийслэлийн Засаг даргын захирамж гарч, газар чөлөөлөлтийг хийх гэсэн боловч тухайн компаний ажилчид гарч ирээд машин тэргэнд суугаад, эксковаторын урд суучихаад ажил хийлгээгүй. Одоо бол газар чөлөөлөх хэсэгт машин, тоног төхөөрөмж суурилуулаад хаачихаад байгаа. 

Манай компаний хувьд гүүр болон 1,2 км урт замынхаа 760 метр замыг бүрэн хийгээд байгаа. Одоо Эрэл компанийхан газар чөлөөлөөд өгөх юм бол 540 метр замаа хийхэд бэлэн байна." хэмээлээ. 

Зам нь 1,2 км урт, 33 метр урт гүүртэй, дөрвөн эгнээтэй, нэг талдаа явган зам, нэг талдаа дугуйн замтай, гэрэлтүүлэг болон ус зайлуулах шугам бүрэн шийдэгдсэн аж.