Өнгөрсөн амралтын өдөр буюу энэ сарын 19-ны өдөр Төв цэнгэлдэх хүрээлэнд "ТАТАР"-ынхан 20 насны төрсөн өдрөө нижгэр тэмдэглэж, 35,000 иргэнийг төв цэнгэлдэхэд цуглуулж, дурсамжаар аялуулав.

Цаг, зав, сэтгэл зүрхээ зориулан очсон 35,000 залууст тэр өдөр тохиосон хамгийн бэрхшээлтэй зүйл нь 00 орох байв... Залуус бие засах газар орохын тулд уртаас урт дараалал үүсгэн, цаг гаруй оочирлов. Үнэхээр хүсэн хүлээсэн тоглолтынхоо хамаг цагийг 00-д оочирлож өнгөрүүлэх хичнээн гунигтай. 

"Төв цэнгэлдэх хүрээлэн” 1993 онд хувьчлагдаж, 49 хувийг нь Нийслэл, 51 хувийг нь Т.Нямдаваа гэгч эзэмшдэг болсон. Тэнцүү шахуу хамтарч эзэмшдэг боловч, өнгөрсөн 30 жил арчилж тордох ажлыг нь Нийслэл хийж, ашгийг нь Т.Нямдаваа л ганцаараа халаасалсаар ирсэн. Нийслэл арчиж, тордох бүх ажлыг хийх боловч баяр наадмын нээлт, хаалтын хоёрхон өдөр л ашигладаг. 2022 оны наадмаар төв цэнгэлдэх хүрээлэнг засварлах ажилд нийслэлээс 4,5 тэрбум төгрөг гаргасан бол 51 хувийг эзэмшигч Т.Нямдаваа 180 сая төгрөг л гаргажээ. 

Харин бусад үед “Төв цэнгэлдэх хүрээлэн” зөвхөн “том” Т.Нямдаваагийнх бөгөөд тэнд зохиогдсон бүх л арга хэмжээний ашгийг тэр ганцаараа хүртэж ирсэн. Нэг тоглолт хийхийн тулд хамтлаг, дуучид түүнд 90,000,000 төгрөг өгдөг аж. Гэвч тэрээр энэ мөнгийг зүгээр л өөрийн мэт халааслаад суух аж. 

Түүнд мөнгөө халааслаад суухаас иргэдэд зориулаад ганц 00 шийдчих сэтгэл байсангүй. 90 сая төгрөг бага биш мөнгө. Иргэддээ зориулаад зөөврийн 00 ч болтугай аваад тавьчих ч сэтгэлгүй Т.Нямдаваагаас "ТӨВ ЦЭНГЭЛДЭХ ХҮРЭЭЛЭНГЭЭ" буцааж авмаар байна.