ӨнөөдөрТоон телевиз гэж юу вэ, юугаараа давуу талтай вэ?
2014 оны 7 сарын 30
Эфирийн тоон телевиз гэж юу вэ?
Үзэгчид телевизийн үйлчилгээг
- Хиймэл дагуулаар (тавган антенн ашиглан сансраас хүлээн авдаг)
- Кабелын шугамаар (Ай пи телевиз болон кабелын телевизүүд)
- Эфирээс (Агаараас энгийн антеннаар, ямар нэгэн үнэ төлбөргүйгээр)
Хиймэл дагуулын болон зарим кабелын телевизүүд тоон системд хэдийн шилжсэн. Харин эфирийн телевизийн өргөн нэвтрүүлэг аналог хэвээр байсаар байна. Одоогийн байдлаар эфирээр орон даяар арилжааны зургаан сувгийг аналог системээр ямар нэг үнэ төлбөргүй иргэдэд хүргэдэг. 2014 оны 7 дугаар сарын 31-нд эфирийн телевизийн өргөн нэвтрүүлэг тоон системд шилжинэ.
Эфирийн телевиз тоон системд шилжсэнээр телевизийн ямар ач холбогдолтой вэ?
- Үзэгчид дуу, дүрсийн өндөр чанартай ТВ сувгуудыг хүлээн авна.
- Тоон систем нь хөдөлгөөнт хэрэглэгчийг дэмжин ажилладаг.
- Хязгаарлагдмал нөөц болох радио давтамжийг хэмнэж өөр шинэ дэвшилтэд технологийн үйлчилгээг хэрэглэгчидэд үзүүлэх боломжтой
- Эрчим хүчний хэмнэлттэй
Эфирийн тоон телевизийг үзэхийн тулд заавал шинэ телевизор авах хэрэгтэй юу?
Энгийн аналоги телевизортоо DVB-T2 / MPEG-4 стандартын хүлээн авах төхөөрөмж(декодер)-ийг залгаснаар эфирийн тоон телевизийн нэвтрүүлгийг хүлээн авч үзэх боломж бүрдэх юм.
Шинэ телевизор авахад юу анхаарах вэ?
Эфирийн тоон телевизийг үзэхийн тулд DVB-T2 / MPEG-4 стандартыг дэмждэг телевизор байхад л хангалттай.
Эфирийн тоон телевиз нь арилжааны кабелийн телевизээс ямар давуу талтай вэ?
Эфирийн тоон телевизийн давуу тал нь төр засгийн бодлогоор үзүүлэх багц сувгуудыг үнэгүй үзэх бөгөөд цаашид үзүүлэхээр төлөвлөж буй өндөр тодролтой (HD TV) формат бүхий телесувгуудын шинэ багцыг үзэх боломж, уламжлалт телевизүүдээс ялгагдах шинэ үйлчилгээнүүд (тухайлбал, Засгийн газраас хэрэгжүүлэхээр төлөвлөж буй онцгой байдлын үед зарлан мэдээлэл хийх, цахим засгийн газарт холбогдох олон төрлийн шинэ үйлчилгээ)-ийг хүртэх боломжийг бүрдүүлэх юм..
Эфирийн тоон телевизийн хүлээн авах төхөөрөмж ямар үнэтэй вэ?
2013 оны 6 сарын байдлаар (кабелийн) тоон телевизийн хүлээн авах төхөөрөмж нь 68 000-аас 90 000 төгрөгийн үнэтэй байгаа. Эфирийн тоон телевизийн хамрах газар нутаг ихсэхийн зэрэгцээ өөр олон загварын DVB-T2/MPEG-4 стандартын хүлээн авах төхөөрөмж зах зээл дээр нийлүүлэгдэж тэр нь үнийг буурахад хүргэх нь гарцаагүй.
АНТЕННА
Одоо хүн амын дийлэнхи хэрэглэж буй телевизийн хүлээн авах гадна антеннууд нь метрийн долгионд зориулагдсан байдаг бол эфирийн телевизийн тоон дамжуулалт нь дециметрийн долгионы цараанд хийгдэнэ. Тоон программыг найдвартай хүлээж авахын тулд дециметрийн долгионы антенныг ашиглана.
Метрийн ба дециметрийн диапазон дахь долгион тархалтын ялгаа юунд орших вэ?
Эфирийн телевизийн сигналыг 48МГц-862МГц дэх давтамжийн зурваст хэт богино долгионы (УКВ) тусламжтайгаар дамжуулдаг. Давтамжийн зурвас нь 2 бүлгийн 5 диапазонд хуваагддаг :
- Метрийн диапазон (МВ)буюу VHF хуваарьт I,II.III (47-180МГц)
- Дециметрийн диапазон(ДМВ) буюу UHF хуваарьт IV,V(470-862МГц)
Дэлхийн улс орнуудад эфирийн телевизийн сувгуудын хуваарилалт хийсэн байдал нь ялгаатай байдаг ч манай улсад мөрдөж буй стандартаар метрийн хуваарьт 1-ээс 12-р суваг, дециметрийн хуваарьт 21-ээс 60-р сувгууд багтдаг.
Хэрэв таны телевизор DVB-T2 тоон хүлээн авагчтай бол та антенны салаалагч аваад одоо хэрэглэж буй кабелийн аналог телевиз болон эфирийн тоон телевизийг хүлээн авах ДМВ-ийн антенныг залгаж болно. Жишээ нь:
Хэрэв та хувийн байрандаа амьдардаг бол антеннаа дээвэр дээр, балкон дээр, цонхны хүрээ , ханан дээрч суурилуулж болно. Антенныг суурилуулахад мачта, кронштейн хэрэгтэй болно. Мачтанд 40-50мм –ийн диамертэй металл труба-г ашиглаж болох бөгөөд салхинд ганхахгүй бат бөх суурилуулах шаардлагатай. Теле сигналыг хамгийн сайн чанартай хүлээж авах байршил дээрээ антенныг эргүүлэн тохируулж кронштейны тусламжтайгаар бэхэлнэ. Антенныг дээвэр дээр байрлуулахад телесигналыг хамгийн сайн хүлээн авч байгаа дурын байршлыг сонгоно.
Эфирийн телевизийн сигналыг хүлээн авах антенны жишээг зургаар үзүүлэв.
Эфирийн тоон телевизийн сигналыг антеннгүйгээр чанар сайтай хүлээн авч болох уу?
Хэрэв та нэвтрүүлэгчид ойр зайд, шууд харагдах орчинд байгаа, сигнал нь чанар сайтай, тогтвортой байгаа тохиолдолд антенна хэрэглэхгүй байж болно. Антенныг кабель утасны хэсгээр орлуулж болно.
ТЕЛЕВИЗОР
Өнөөдөр Монгол улсын хэмжээнд ажиллаж буй аналоги телевизор нь эфирийн тоон телевизийн сигналыг хүлээн авахад тохирохгүй юм.
Эфирийн тоон телевизийн сигналыг хүлээн авахад өөртөө DVB-T2/MPEG-4 стандарт, MULTIPLE PLP горимыг дэмждэг тоон тюнертэй телевизор эсвэл DVB-T2/MPEG-4 стандартыг дэмжих тоон хүлээн авах төхөөрөмж, түүнд холбогдож ажиллах энгийн аналоги телевизорын аль нэгийг авах бөгөөд дециметрийн долгионы антенна ашиглана. Антенна нь нийтийн /коллектив /эсвэл хувийн антенна байж болно. Эфирийн тоон телевизийн сигналыг хүлээн авахдаа өөрийн телевизор ба/эсвэл хүлээн авах төхөөрөмжийн ашиглалтын зааврын дагуу тохиргоог хийнэ.
Тохиргоо хийх ерөнхий зөвлөмж:
- Антенны кабелийн төгсгөл дэх залгуурыг телевизортоо(хэрэв өөртөө тюнертэй телеевизор бол ), эсвэл тоон хүлээн авах төхөөрөмжинд залгана.
- Сувгийг автоматаар хайгч цэсээр хайх-энэ үед эфирийн тоон харгалзах суваг сонгогдох бөгөөд сувгийн хайлтыг гар горимоор хийх тохиолдолд сувгийн давтамжийг зааж өгнө.(жишээ нь: телевизийн 35-р сувгийн давтамж нь 685 МГц г.м)
- Ихэнх тоон телевизор, хүлээн авах төхөөрөмж нь сигналын түвшин ба чанарыг тодорхойлдог индикатортай байдаг. Энэ нь таны антенны хамгийн зөв байршлыг тогтоох зориулалттай.
Хөдөө орон нутагт эфирийн тоон телевизийн нэвтрүүлгийг хүлээн авах хэрэглэгч нэвтрүүлэгчээс алслагдсан байрлалд байж болох тул өсгөлтийн коэффициент өндөртэй, дециметрийн долгионы гадна антенныг хэрэглэх бөгөөд аль болох өндөрт байрлуулах шаардлагатай.
Монголын зах зээл дээр борлуулагдаж буй телевизорууд нь DVB-T2 стандартыг дэмжих эсэх талаар баталгаат мэдээллийг шалгахыг зөвлөж байна.
ХҮЛЭЭН АВАХ ТӨХӨӨРӨМЖ
Эфирийн тоон телевизийн нэвтрүүлгийг хүлээн авахад дециметрийн долгионы антенны зэрэгцээ эфирийн тоон телевизийн хүлээн авах төхөөрөмж хэрэглэгдэх бөгөөд декодер, ресивер, set-top- box гэсэн нэршилтэй байдаг.
Эфирийн тоон хүлээн авагч ба аналоги телевизорын оронд тоон нэвтрүүлгийн DVB-T2 стандартыг дэмжин ажилладаг, орчин үеийн тоон телевизор хэрэглэж болно.
Гагцхүү эфирийн тоон телевизийн сүлжээ ашиглалтанд орохоос урьтаж тоног төхөөрөмж худалдан авахыг яарахгүй байхыг зөвлөе.
Таны оршин суугаа сум, дүүрэг, хороо/баг-т эфирийн тоон телевизийн нэвтрүүлэг орох хүртэл хүлээзнэн худалдан авах гэж байгаа тоног төхөөрөмжөө шалгаж үзэх нь чухал.
Эфирийн тоон телевизийн хүлээн авах төхөөрөмж (декодер, ресивер,set-top- box-STB) нь эфирийн тоон сигналыг хүлээн авч таны аналоги телевизор руу дамжуулах зориулалттай авсаархан төхөөрөмж бөгөөд түүнийг худалдан авахдаа дараахи зүйлийг тодруулах шаардлагатай:
- Төлбөртэй үйлчилгээнд хэрэглэгддэг смарт картыг уншиж таних боломжтой эсэх (CAM-модуль)
- USB (universal service bus)-оролтоор бичлэг хийх, унших боломжтой эсэх
- Өндөр тодрол(HD-high definition)-той телесувгуудыг хүлээн авах боломжтой эсэх г.м
Мэдээж хүлээн авах төхөөрөмжийн техникийн боломж үнэ өртөгт тусах нь ойлгомжтой.
Танд хүлээн авах төхөөрөмжийн засвар үйлчилгээний төв байгаа эсэхэд анхаарлаа хандуулахыг зөвлөе.
DVB-T2 хүлээн авах төхөөрөмж нь эфирийн тоон телевизийн нэвтрүүлгүүдийг хэрэглэгч одоо хэрэглэж байгаа аналоги телевизороо ашиглан үзэх боломжийг олгох бөгөөд тохиргоо, болон суурилуулалт нь тусгайлсан дадлага, мэдлэг шаарддаггүй , ямар ч хэрэглэгч ашиглахад хялбар бөгөөд тохиромжтой.
Мэдээнд өгөх таны үнэлгээ?
6498
0 эможи