Монголын иргэн онгоцонд согтууруулах ундаа хэрэглэж, бусдад саад учруулсан хэргээр Казахстаны Тээврийн цагдаад саатуулагдаж, торгуулсан гэж  "Tengritravel" агентлаг мэдээлжээ.

Эх сурвалжийн мэдээлснээр, 08 дугаар сарын 14-ны өдөр Стамбул-Астана чиглэлийн нислэг үйлдсэн "СКАТ"  онгоцны багийнхан онгоцонд зөрчил үйлдэж байгаа зорчигчийн талаарх мэдээллийг Астана хотын олон улсын нисэх буудал дахь цагдаагийн хэлтэст хүргүүлжээ.

"Онгоцны зорчигч нислэгийн үеэр согтууруулах ундаа хэрэглэж, зорчигчдын амгалан тайван байдлыг алдагдуулсан" гэж багийн гишүүд  мэдэгдсэн байна.

Нисэх буудлын цагдаагийн хэлтэс мэдээллийг шалгаад, хэргийг Тээврийн цагдаагийн газарт шилжүүлсэн бөгөөд зөрчил гаргасан этгээд нь Монгол Улсын, 39 настай иргэн гэдгийг тогтоон, цагдаагийн хэлтэст хүргүүлжээ. 

Шалгалтаар согтууруулах ундаа их хэмжээгээр хэрэглэсэн нь тогтоогдсон түүнд захиргааны хариуцлага тооцон, хөдөлмөрийн хөлсийг тав дахин нэмэгдүүлсэн хэмжээгээр МӨНГӨН ТОРГУУЛЬ оноожээ.