Нийслэлийн Засаг даргын Тамгын газар, нийслэлийн Аялал жуулчлалын газар Монголын бурхан шашинтны төв Гандантэгчэнлин хийдтэй хамтран “Даншиг наадам-Хүрээ цам 2023” шашин соёлын наадмыг ирэх наймдугаар сарын 5, 6-нд Хүй долоон худагт зохион байгуулна. Үүнтэй холбогдуулан Монголын үндэсний бөхийн холбооноос дараах мэдээллийг гаргалаа. 

• Хүрээ цам Даншиг наадмын үндэсний бөхийн барилдаанд 256, өвөр монгол, буриад бөхийн барилдаанд тус бүр 64 бөх барилдана.
• Бөхийн барилдаануудын нэг, хоёрын даваа наймдугаар сарын 05-нд, гурваас дээших даваа 6-нд болно.
• Дээрх гурван төрлийн бөхийн барилдааныг сугалаагаар барилдуулах бөгөөд барилдааны сугалааг наймдугаар сарын 4-нд Монгол бөхийн өргөөнд зохион байгуулна. Үндэсний бөхийн барилдаанд Даншигийн цолтой бөхчүүдийн эрэмбийг харгалзана.
• Монгол туургатан зочин бөхчүүд үндэсний бөх болон буриад, өвөр монгол бөхийн барилдаанд оролцон барилдах боломжтой харин улс, аймаг, сумын цолтой бөхчүүд барилдаанд давхар оролцохгүй аль нэг барилдааныг сонгон барилдана.
• Үндэсний бөхийн барилдааныг МҮБХ-ны баталсан “Бөхийн барилдааны дүрэм”-ээр зохион байгуулна.

Зохион байгуулагчид болон ивээн тэтгэгч байгууллагуудаас бай шагналыг дараах байдлаар тогтоожээ.

Үндэсний бөхийн барилдаанд:

• Түрүүлсэн бөхөд 15 сая төгрөг, мөнгөн тоногтой эмээл, хазаар болон ивээн тэтгэгч байгууллагын шагнал
• Үзүүр бөхөд 10 сая төгрөг
• Их шөвгийн хоёр бөхөд тус бүр гурван сая төгрөг
• Давааны бай шагнал 1-5 давсан бөхчүүдэд олгогдоно.

Буриад бөхийн барилдаанд:

• Түрүүлсэн бөхөд 10 сая төгрөг, мөнгөн тоногтой эмээл, хазаар
• Үзүүр бөхөд таван сая төгрөг
• Их шөвгийн хоёр бөхөд тус бүр гурван сая төгрөг
• Давааны бай шагнал 1-3 давсан бөхчүүдэд олгогдоно.

Өвөр монгол бөхийн барилдаанд:

• Түрүүлсэн бөхөд 10 сая төгрөг, мөнгөн тоногтой эмээл, хазаар
• Үзүүр бөхөд таван сая төгрөг
• Их шөвгийн хоёр бөхөд тус бүр гурван сая төгрөг
• Давааны бай шагнал 1-3 давсан бөхчүүдэд олгогдоно.