Монгол Улсын Засгийн Газраас хэрэгжүүлж буй “Шувуу” ажиллагааны хүрээнд Мөрдөн шалгах ажиллагаанаас гадаад улс руу оргон зайлсан, интерполоор эрэн сурвалжилж, гадаад улсаас буцаан авчрах 42 хүний нэрийг Хууль зүй, дотоод хэргийн сайд Х.Нямбаатар зарлаж байсан. Шувуу ажиллагааны хүрээнд авлига, албан тушаалын гэмт хэрэгт шалгагдаж байгаад оргон зайлсан хүмүүсийг авчрах бүх талын арга хэмжээг авч ажиллаж байгаа талаар мэдээлж байсан юм. 

Тэгвэл эдгээр хүмүүсийн тоонд багтсан Жамъянгаравын Отгонбаатарыг БНТУ-аас авчирч цагдан хорих 461 дүгээр ангид хүлээлгэн өгч, цагдан хорьжээ. 

Тодруулбал, Баянгол дүүргийн Эрүүгийн хэргийн анхан шатны шүүхийн шүүгчийн захирамжаар эрэн сурвалжлагдаж байгаад Бүгд Найрамдах Турк Улсын Дотоод хэргийн яамны Цагаачлалын албаны харьяа “Кожа-Элийн” албадан буцаах төвд саатуулагдсан шүүгдэгч Ж.Отгонбаатарыг хүлээн авч,  Монгол Улсад  энэ сарын 26-ны өдөр  хуяглан авчирсан байна. Улмаар шүүгчийн захирамжийн дагуу цагдан хорих таслан сэргийлэх арга хэмжээ авсан байна.

Ж.Отгонбаатар нь дээрэмдэх, бусдын биед хүндэвтэр гэмтэл учруулах хэрэгт оргодлоор 2019 оноос хойш эрэн сурвалжлагдаж байгаа аж.