Хөгжлийн Банкны шүүх хурал 12 дахь өдрөө үргэлжилж байна. Энэ үеэр хүний амь нас хөнөөсөн хэргээр ял эдэлж буй Хөгжлийн Банкны ТУЗ-ийн гишүүн асан Б.Махбал улсын яллагч болон өмгөөлөгчийн асуултад хариуллаа. 

Тэрбээр Хөгжлийн Банкны шүүх хуралд “эрх мэдэл, албан тушаалын байдлаа урвуулан ашиглах” гэмт хэрэгт холбогдон яллагдагчаар татагдаад байгаа юм.

Улсын яллагч түүнээс 2017 оны есдүгээр сарын төлөөлөн удирдах зөвлөлийн хуралд биечлэн оролцоогүй, бичгээр санал гаргаагүй ч яагаад ТУЗ-ийн тэмдэглэл дээр гарын үсэг зурсан талаар асуусан юм. 

Хариуд нь тэрбээр, “Есдүгээр сарын 27-ны үдээс хойш намайг хөдөө явж байхад ТУЗ-ийн нарийн бичгийн дарга утастаад маргааш ТУЗ хуралдана. Оролцох боломжтой юу? гэж асуусан. Би ээлжийн амралттай байгаа учраас боломжгүй. Нэлээд удаан хугацаагаар хөдөө байна гэж хэлсэн. Тухайн өдөр буюу 28-ны өдөр хуралдсан эсэхийг мэдээгүй. Түүнээс хойш 10 гаруй хоногийн дараа ТУЗ-ийн нарийн бичгийн дарга Хулан, төслийн санхүүжилт зээлийн газрын мэргэжилтэн Батзоригийг дагуулж ТУЗ-ийн шийдвэрийг танилцуулахаар манай гэрийн гадаа ирсэн. Би танилцаж гарын үсгээ зурсан” гэлээ.