Цаг уур, орчны шинжилгээний газраас 2023 оны дөрөвдүгээр сарын 18-24-ний цаг агаарын аюултай үзэгдлийн тоймыг танилцууллаа. Долоо хоногийн хамгийн дулаан нь 18-нд Дорноговийн Хөвсгөл суманд +27 градус дулаан байжээ. Энэ сарын 19-нөөс ихэнх нутгаар хүйтэрч Увс нуур болон Дархадын хотгор, Завхан голын эх, Тэс голын хөндийгөөр -12...-17 градус, Алтай, Хангай, Хөвсгөл, Хэнтийн уулархаг нутаг, Туул, Тэрэлж голын хөндийгөөр -8...-13 градус хүйтэн, говийн бүс нутгийн өмнөд хэсгээр -2...+3 градус дулаан, бусад нутгаар -3...-8 градус хүйтэн байсан байна. Долоо хоногийн хамгийн хүйтэн нь Баян-Өлгийн Сагсайд -21.0 градус хүрч хүйтэн хоножээ.

18-ны өдөр Ховд, Говь-Алтай, Завханы нутаг, Увс, Хөвсгөлийн өмнөд хэсгээр салхи 18-30 м/с, зарим үед 34-40 м/с хүрч онц хүчтэй салхи, шороон шуурга шуурч, 18-19-нд шилжих шөнө Говь-Алтай, Өвөрхангай, Дундговь, Өмнөговийн нутаг, Завхан, Хөвсгөл, Булган, Төв аймгийн өмнөд хэсгээр салхи 16-21 м/с хүрч, зарим үед 24-29 м/с хүчтэй салхи шороон шуурга шуурч цаг агаарын аюултай болон гамшигт үзэгдэл   ажиглагдсан байна. Үүнээс 18-ны өдөр Говь-Алтайн Бугатад салхины хурд 30 м/с, зарим үед 37 м/с, Ховдын Зэрэг, Дарвид 20-21 м/с, зарим үед 34 м/с, Завханы Сонгино, Түдэвтэй, Нөмрөгт 28 м/с, зарим үед 40 м/с хүрч хүчтэй салхины, Завханы нутаг, Увсын өмнөд хэсгээр онц хүчтэй шороон шуурга 1-9 цаг шуурч цаг агаарын гамшигт үзэгдэл ажиглагдсан байна.

Цасны зузаан: Цаг уурын станц, харуулын цасны зузааны мэдээгээр өнгөрсөн хоногт Баян-Өлгийн баруун өмнөд, Завханы зүүн, Архангайн нутаг, Баянхонгор, Өвөрхангайн хойд, Булган, Төв, Хэнтийн аймгийн зарим газраар 1.0-10.0 см зузаан цасан бүрхүүл тогтсон байна. Үүнээс хамгийн их нь Завханы Яруу 10 см, Архангайн Хангай 9 см, Баян-Өлгийн Сагсай, Архангайн Тариат 8 см, Завханы Идэр 6 см, Өвөрхангайн Бат-Өлзий, Архангайн Булган 5 см, Архангайн Цэцэрлэг, Цахир, Баянхонгорын Шаргалжуут 4 см, бусад хэсгээр 1.0-3.0 см цасан бүрхүүл тогтсон байна.

Хур тунадас: 18-нд баруун аймгуудын нутгийн зүүн, төвийн аймгуудын ихэнх нутаг, 19-нд нутгийн зүүн хэсгээр, 20-нд Алтай, Хангай, Хөвсгөлийн уулархаг нутгаар, 22,23-нд баруун аймгуудын нутаг болон төвийн аймгуудын нутгийн баруун хэсгээр нойтон цас, цас орж, цасан шуурга шуурсан байна. 23-нд баруун аймгуудын нутгийн зүүн, төвийн аймгуудын нутгийн баруун хэсгээр 1-7 мм бороо, нойтон цас орсоноос хамгийн их нь Архангайн Тариат, Хангай 7.0 мм бороо нойтон цас орсон байна. Өнгөрсөн 7 хоногийн нийт тунадасны нийлбэрээр Завханы Идэр, Архангайн Тариат, Хангай 7.0, Баян-Өлгийн Ялалт, Дөчинжил, Завханы Яруу 6.0 мм нойтон цас, цас орсон байна.

Cалхи: 17-нд  баруун аймгуудын ихэнх нутгаар онц хүчтэй салхилж секундэд 9-14 метр, зарим газраар 40 метр хүрч гамшгийн хэмжээнд хүрсэн байна. 18-нд ихэнх нутгаар, 19-нд нутгийн зүүн хэсгээр салхи секундэд 18-20 метр, зарим үед секундэд 26-28  метр хүрч ширүүсэж, шороон шуурга шуурсан байна. 17-нд Завханы Сонгино, Түдэвтэй, Нөмрөг сувдын нутгаар секундэд 34-40 метр хүрч ширүүссэн байна.