АТГ-аас энэ сарын 13-ны өдөр /2022.12.13/ нүүрсний гэх хэрэгт холбогдсон нэр бүхий УИХ-ын хэдэн гишүүдийн нэрийг зарласан бөгөөд үүнтэй холбоотойгоор Ц.Анандбазар, Ш.Раднаасэд нарын гишүүд АТГ-ын гадна мэдээлэл хийсэн билээ. 

Тухай үед УИХ-ын гишүүн Ц.Анандбазар, "Нүүрсний хулгайн мөнгөөр ипотекийн зээлийг төлүүлэх хуулийн төсөл өргөн барина. Би өөрөө бурхны шашинтай хүн хулгай гэдэг зүйлийг үзэн яддаг хүн. Ард түмэнтэйгээ нэгдэж тэмцээд жинхэнэ хулгайчийг гаргаж ирнэ. Би сонгогдоод ард иргэд ядуу байна гэж ярьсан гэтэл Сүнээ гээд баахан хүмүүстэй холбосон. Унтаж байгаа баавгайг сэрээсэн хулгайч нар өөрсдөө гомдох цаг ирнэ" гэдгийг тодотгосон. 

Тэгвэл түүнийг чухам ямар үндэслэлээр АТГ-аас нүүрсний хулгайн хэрэгт холбогдсон талаарх мэдээлэл одоогоор ил болоогүй байгаа. Ямартай ч УИХ-ын гишүүн Ц.Анандбазар "Сод Монгол Групп" ХХК 2020 оны наймдугаар сарын 27-ны өдөр "Эрдэнэс тавантолгой" ХК-тай "Дизель түлш, авто бензин" нийлүүлэх 2 тэрбум 715 сая, 815 мянга 550 төгрөгийн үнийн дүн бүхий №этт-2020/520 дугаартай гэрээг байгуулсан байна. Магадгүй энэ мэт гэрээтэй холбоотойгоор түүнийг нүүрсний хулгай гэх хэрэгт холбогдуулан яллагдагчаар татсан байж болзошгүй юм.