Өчигдөр орой 20:56 цагт Хан-Уул дүүргийн 14-р хороо Нисэхээс Төв аймаг орох замд ачааны автомашин автобустай мөргөлдсөн ноцтой осол гарсан талаар бид өмнө мэдээлж байсан.

Тодруулбал, Өмнөговиос-Улаанбаатарын чиглэлд хүн тээвэр хийж байсан нэр бүхий компанийн ажилчдын автобус, ачааны Хино загварын автомашинтай мөргөлдсөн осол гарсан.

Энэ талаар ТЦА-аас тодруулахад, ослын улмаас автобус жолоодож явсан жолооч газар дээрээ нас барсан бол 29 зорчигч хүнд бэртэл гэмтэл авсны улмаас эмнэлэгт хүргэгдсэн байна. Одоогоор ослын дүгнэлт гараагүй байна гэсэн мэдээлэл өглөө.

Энэ талаар бид албаны мэдээллийг өгөхөөр тодруулж байна. Удахгүй дэлгэрэнгүй мэдээллийг хүргэх болно.

СЭРЭМЖЛҮҮЛЭГ: Иймд зам тодорхой хэмжээнд халтиргаа гулгаатай, үзэгдэх орчин хязгаарлагдмал нөхцөлд онцгой сонор сэрэмжтэй зорчиж, аюулгүй байдлаа бүрэн хангах, орон нутгийн замд хөдөлгөөнд оролцохдоо зам орчны нөхцөл байдалдаа хурдаа тохируулан, гүйцэж түрүүлэх үйлдлийг хориглосон нөхцөл байдалд хийхгүй байхыг Тээврийн цагдаагийн албанаас анхааруулж байна.