Гэр хорооллын айл өрхийн эрчим хүчний хэрэглээнд улсаас шөнийн тарифын хөнгөлөлтийг 11 дүгээр сарын 1-нээс үзүүлдэг. Энэ талаар Эрчим хүчний зохицуулах хорооноос тодрууллаа.

"Эрчим хүчний зохицуулах хорооноос гэр хорооллын айл өрхөд цахилгааны шөнийн тарифын хөнгөлөлт үзүүлэх шийдвэр гараагүй байна. 2023 оны улсын төсөвт санхүүжилт тусгагдаагүй. Энэ асуудлаар Эрчим Хүчний Яаманд хандсан. Санхүүжилт шийдэгдсэн тохиолдолд шийдвэрээ гаргана. Энэ жил гэр хорооллын айл өрхийн цахилгаан эрчим хүчний шөнийн тарифын хөнгөлөлтөд 37.9 тэрбум төгрөгийн санхүүжилт шаардлагатай байгаа. Энэ долоо хоногт шийдвэр нь гарах байх гэсэн хүлээлттэй байгаа.

Өөрөөр хэлбэл шийдвэр гараагүй учраас маргаашаас шөнийн тарифын хөнгөлөлт үйлчлэхгүй.

Энэ оны 11, 12 дугаар сард эрчим хүчний хөнгөлөлт үзүүлэх гэхээр 7.7 тэрбум орчим төгрөг батлагдсан төсвөөсөө илүү гарна.

Өмнөх онуудын өрийн тухайд 2017-2020 онд 6.8 тэрбум, 2021 онд 7.7 тэрбум төгрөгийн алдагдалтай байна" гэв.