Лхагва гарагийн шөнө (2022.09.08) Эрүүгийн цагдаагийн албанаас тайчих үзүүлбэр үзүүлдэг “SQ”, “STYX” нэртэй баарнуудад шалгалт хийсэн. Шалгалт хийх үеэр "тайчих үзүүлбэр үзүүлдэг охид болон үйлчлүүлэгч" гэх иргэдээс хар тамхи, мансууруулах бодис хэрэглэсэн эсэхийг шалгахад 2 иргэнээс мансууруулах төрлийн бодис илэрч, биеэс нь хураан авсан байна. 

Эх сурвалжийн мэдээлснээр хар тамхи, мансууруулах төрлийн бодис илэрсэн 2 иргэний нэг нь Гаалийн Ерөнхий газрын Хар тамхи зөрчлийн албаны улсын байцаагч "Д" болох нь тогтоогдсон аж. 

Харин өчигдөр буюу есдүгээр сарын 08-ны өдөр ГЕГ-аас тодруулахад тайчих клубт хар тамхи хэрэглэсэн гаалийн улсын байцаагч "Д"-г ажлаас нь чөлөөлөх шийдвэр гарсан нь үнэн гэв. 

Гаалийн улсын байцаагч "Д"-н хувьд Гаалийн Ерөнхий газарт зөрчлийн байцаагчаар 3-4 жил ажилласан бөгөөд Буянт-Ухаа дахь гаалийн газрын даргаар ажиллаж байгаад тэтгэвэртээ гарсан С.Цэцгээгийн хүү хэмээн албан бус эх сурвалж мэдээллээ. С.Цэцгээгийн тухайд гаалийн байгууллагад насаараа ажилласан хэрнээ 3.7 тэрбумаар үнэлэгдэх 4 хаус, 11 орон сууц, гурван барилга, 12 авто зогсоол, 6 авто машин, 12 газартай, дотоодын банкуудад 751 сая төгрөгийн хадгаламжийг бий болгосон байдаг. Түүний хураасан хөрөнгө, орлого ил болсноор олны гайхшралыг төрүүлж, насаараа Гаалийн байгууллагад ажилласан хүн хэрхэн тэрбумтан болж тэтгэвэртээ гарч буйг харуулдаг тод нэгэн жишээ юм. 

Хар тамхи хэрэглэсэн байцаагч "Д"-н ээж С.Цэцгээ нь Хөгжлийн банкнаас 19 тэрбумын зээлийг авсан найдваргүй зээлдэгч “Сонгоулд” ХХК-ийг ард байдаг хэмээн өмнө нь хэвлэл мэдээллээр маш олон баримтууд дэлгэгдсэн байдаг. 

Албан бус эх сурвалжийн хэлж буйгаар байцаагч "Д" нь богино хугацаанд тушаал дэвшиж, хэн бүхний хүсээд орж чаддаггүй зөрчлийн албанд нэлээдгүй удаан хугацаанд ажилласан нь ардаа том мотортой байсныг харуулж байна гэв.