Чангшин их сургуульд суралцахаар БНСУ-ыг зорьсон сонсогч, оюутны төлөөллөөс сэтгэгдлийг нь сонслоо.

Намайг Ж.Өнөболд гэдэг. Эрх зүй, нийгмийн ухааны сургуулийн Эрх зүй хөтөлбөрийн 232 дугаар дамжааны ангийн дарга. Би Дотоод хэргийн их сургуулийнхаа 2+2 хөтөлбөрт хамрагдан Чангшин их сургуульд суралцахаар БНСУ-ыг зорьж байгаадаа туйлын баяртай байна. Энэхүү хөтөлбөрт хамрагдсанаар Монгол, Солонгосын нэр нөлөө бүхий хоёр их сургуулийн бакалаврын хос дипломтой төгсөх боломжтойд маш их олзуурхаж байгаа. Манай ЭЗНУС-аас 24 суралцагч эл хөтөлбөрт хамрагдан БНСУ-ыг зорьж байна.

Би Чангшин их сургуульд “Цагдаагийн удирдлага” мэргэжлээр суралцана. Миний аав, ээж хоёр хоёул төрийн албан хаагчид. Бага байхаас минь л эрх зүйгээр суралцахыг зөвлөдөг байсан. Аав, ээжийнхээ зөвлөснөөр, мөн өөрийн дур сонирхлоор энэхүү мэргэжлийг сонгож, Дотоод хэргийн их сургуульд элсэж байлаа. Оюутан болоод удалгүй БНСУ-д суралцан хос дипломтой төгсөх боломжтой энэхүү хөтөлбөрийн талаар сонсож мэдсэн.

Би прокурор болох мөрөөдөлтэй. Шүүх, прокурор, цагдаа гурав хоорондоо нягт уялдаа холбоотой ажилладаг. Ховорхон тохиох завшаанаар БНСУ-д “Цагдаагийн удирдлага” мэргэжлийг эзэмшихээр явж байна. Цагдаа хэрхэн ажилладаг, ямар байх ёстой талаар судалж, мэргэших нь сайн прокурор болоход хэрэгтэй. Тэр тусмаа өндөр хөгжилтэй орны цагдаа нар хэрхэн ажилладгийг дэргэдээс нь харж, судлах нь алсдаа эх орныхоо хөгжилд өөрийн хувь нэмрийг оруулсан мундаг прокурор болоход минь ихээхэн нэмэр болно гэж бодож байна.

Залуустаа хандаж хэлэхэд, мөрөөдөлдөө үнэнч, тууштай байгаарай. Амжилтад хүртлээ өөрийгөө дайчлаарай. Болохгүй зүйл гэж байдаггүй. Чадахгүй зүйл гэж бий. Чадахгүй зүйлийг хүн сурч болдог шүү.