Хан-Уул дүүргийн Засаг даргын Тамгын газрын захиалгаар Яармагийн авто замд явган хүний нүхэн гарц байгуулахаар болсон.

Энэ хүрээнд авто замыг сэтэлж, бүтээн байгуулалтын ажлыг үргэлжлүүлэх шаардлагатай тул “Хүннү молл”-ын баруун урд талын уулзвараас “Шинэ өргөө” хороолол хүртэлх 200 метр замын хөдөлгөөний зохион байгуулалтыг өчигдрөөс эхлэн түр хугацаагаар өөрчилсөн. Тэгвэл энэ талаар Б.Жаргалсайхан өөрийн цахим хаягтаа сэтгэгдлээ хуваалцсан байна.

"Гэнэт цахилгаан тасардаг, зам талбай хаадаг соёлгүй гэмээр үйлдлийг хотынхон маань үзүүлдэг. Мэдээж цахилгааны хязгаарлалт, зам засварын талаар мэдээлэл тавьдаг ч эзэн буюу хэрэглэгч нарт хүрдэггүй. Нэг буланд зам хаачихаад байхад түгжрэлд орчихлоо гээд зосоод байхад хэл чимээ өгдөггүй. Нэг ковшны сүүдэр хэдэн нөхөд хөзөр тоглож байх жишээтй. Өчигдөр хотын орлогч Ж.Сандагсүрэн иргэдийн, миний асуух гээд асуултын холбогдох хүмүүсээс нь асуулаа.

Яагаад зураг төслөө өнгөрсөн жил сул зогсохдоо гаргаагүй вэ. Яагаад хагас бүтэн сайн өдөр зам засварын ажил хийж болдоггүй юм бэ. Яагаад бужигнатал ажил хийхгүй байна гэж асуув. Дарга нар инженерээс илүү мэдлэгтэй царайлаад байх нь тэнэг харагддаг ч иргэд үүнийг хүсээд байгаа юм. Зам засварын нөхөд шөнөдөө ажлаач, ковшны сүүдэрт хэвтэж байгаа нөхөд оройн бэлтгэл ажлаа хангаач, шөнөдөө бүх хүчээрээ дайраач. Хятадууд бол ганцхан шөнийн дотор зам тавьдаг. Тэдний онцлог бол хүний олноор тавина. Германчууд зам засвар хийх гэж бэлдээд л байна. Ажлын хувцас, хоол ундаа хүртэл дөхүүлж байгаад ааг амьсгаагүй дайрах юм. Манайхан зунжин найр наадамд явж ирчихээд сургууль, тариа будаа эхлэхтэй зэрэгцээд зам засвар, шугам хоолойгоо сольж тэнэгтэнэ" гэжээ.