Цагдаагийн байгууллагаас хүн амины ноцтой хэргийг үйлдээд зугтсан этгээдийг шуурхай эрэн хайх ажиллагааг явуулж, дайчлан баривчилжээ. 

Тодруулбал, өнгөрсөн бямба гарагт буюу 07 дугаар сарын 30-ны өдөр Хэнтий аймгийн Норовлин сумын 4-р багийн нутаг дэвсгэрт “Хашааны гадна эрэгтэй хүн дээшээ харсан байдалтай нас барсан байна” гэх дуудлага мэдээлэл цагдаагийн байгууллагад иржээ. 

Хэргийн шалгалтаар 60 настай, эрэгтэй Х нь урьдчилсан байдлаар зам тээврийн ослын улмаас амь хохирсон байж болзошгүй нөхцөл байдал тогтоогдсон байна. Цагдаагийн байгууллагаас уг хэрэгтэй холбоотой этгээдийг эрэн сурвалжлах ажлыг зохион байгуулахад Хэнтий аймгийн харьяат 47 настай О нь 07 дугаар сарын 29-ний өдөр согтууруулах ундааны зүйл хэрэглэсэн үедээ Приус машинаараа дээрх хохирогчийг дайрсан нь тогтоогджээ. 

Улмаар уг хэргээ нуун далдлахын тулд хэрэгтэн О нь ослын газраас 4 метр орчим зайд цогцосыг зөөвөрлөн, замын хажууд орхисон байсныг цагдаагийн алба хаагчид мэргэжлийн ур чадвар гарган илрүүлж, хэрэгт холбогдсон сэжигтэй этгээдийг баривчилжээ.