Өмнөд Солонгост ажил хөдөлмөр эрхэлж байсан Монгол улсын иргэн ослын улмаас амиа алдсан тухай тус улсын хэвлэлүүд мэдээлжээ.

Ганвондо мужийн Ганнюн хотод болсон поп од PSY-ийн тоглолтын дараа тайзыг буулгах үеэр 20 орчим насны монгол залуу өндрөөс унаж амиа алдсан байна.

Орон нутгийн онцгой байдлын алба хохирогчийг Ням гарагийн 15:53 цагийн үед 15 метр өндөр гэрэлтүүлгийн цамхаг дээрээс халтирч унасан тухай мэдээлжээ.

Хохирогчийг даруй эмнэлэгт хүргэсэн ч зүрх нь зогссон байна.

Орон нутгийн цагдаагийн байгууллага уг осолд ажил олгогч буруутай эсэхийг мөрдөн шалгаж эхэлжээ. PSY-ийн тоглолт Бямба гарагийн орой Ганнюн хотын спорт цогцолборт зохион байгуулагдсан юм байна.

Түүний харьяалагддаг P-Nation агентлаг гаргасан мэдэгдэлдээ талийгаачийн ар гэрийнхэнд гүн эмгэнэл илэрхийлээд ажил явдалд нь чадах бүхнээрээ туслахаа амлажээ.

PSY-ийн эх орондоо зохион байгуулж буй “Psy Soak Show 2022” аялан тоглолт долдугаар сарын 9-ний өдөр Инчеон хотод эхэлсэн юм байна.