Иргэдийн амрах, ая тухтай орчныг бүрдүүлэхээр нийтийн өмчийн зарим байршлыг чөлөөлөн, тохижуулах ажилд гарсан зөрчилдөөний талаар мэдээлж байна.

Нийслэлийн Засаг даргын Ахлах зөвлөх Д.Мөнх-Эрдэнэ "Дархан цаазат Богд хан уулын Зайсангийн амны амралт зугаалгын буюу ногоон бүс рүү нэвтрэх ганц орох, гарах гарцыг экскаватораар хаасан байсан. Ингэснээр онцгой нөхцөл байдал үүссэн үед цагдаа, эмнэлэг, онцгой байдлын алба очиж ажиллах аргагүй болгосон байв. Иймд иргэдээс ирүүлсэн гомдлын дагуу экскваторыг холдуулах, хогийг зөөх ажлыг хийсэн. МҮИС болон түүнтэй холбоотой байгууллагууд тухайн хэсэгт 38.2 га талбайг ашигладаг. Газар эзэмшигч зөвшөөрсөн хүрээнд газрын аль нэг ашигтай талыг ашиглахыг хэлдэг. Тэнд барилга барихыг хориглодог. Гэтэл сүүлийн таван жилийн байдлаар гэмт хэрэг зөрчлийн дуудлага тухайн бүс дээр ирж байсан. Судалгаа шинжилгээ явагддаг биш гэмт хэргийн зөрчил гардаг газар болчихсон байсан.  Газрын тухай хуулийн дагуу албадан буулгах ажиллагаа явагдсан. Холбогдох бүх хуулийн дагуу явагдсан үйл ажиллагаа юм. Албадан  буулгасан объектуудын нэлээд нь нурж унах эрсдэлтэй болсон байсан.

МҮИС удаа дараа хууль зөрчиж байгаа. Баянгол дүүрэгт дөрвөн ч газарт архитектур төлөвлөлтийн даалгаваргүйгээр барилгын ажил эхлүүлсэн. Хуулийг дэвсэлж сурсан хүмүүс байна. Хууль зөрчдөг газрын мафижсан хүмүүстэй нийслэл тэмцэнэ. н.Бадамжунай тэргүүтэй мафижсан нөхдүүдийг хуулийн байгууллагаар шалгуулна. Эдгээр хүмүүсийг өмөөрч хамгаалдаг улс төрчидтэй тэмцэнэ." гэлээ.