Н.Түвшинбаярт холбогдох хэргийн шүүх хурал хоёр дахь өдрөө үргэлжилж байна.

Хохирогчийн өмгөөлөгч “Мөрдөн шалгах явцад цугларсан баримтаас үзэхэд Н.Түвшинбаяр 15-20 минутын туршид Э.Энхбатын дээр суугаад зодсон.

Хаалга онгойлгосны дараа орж ирсэн хүмүүсийг “ойртвол ална шүү” гэж сүрдүүлээд, зодсон.

Энэ нь гэмт хэргийг үйлдэхийн тулд нөхцөл байдлыг бүрдүүлсэн гэж үзэх боломжтой байна. Олон тооны шарх, гэмтэл бэртлүүдийг үндэслэн хэргийг хүндрүүлэх нь зөв гэж үзэж байна. Хохирогчийн биед үүссэн нийт шарх сорвийн тоо 21 байна. Зодуулсны улмаас хохирогчийн тархины 90 хувь нь үхэжсэн. Энэ тохиолдолд эмнэлгийн байгууллагын тодорхойлолтоор “хүн ургамал” гэж нэрлэдэг юм байна. Ийм хэмжээнд тултал хүнийг зодож, хохироосон байна. Үл ялих шалтгаанаар Э.Энхбатыг зэрлэгээр зодож, амь насыг нь хохироосон байна" гэв.