Эрүүгийн Цагдаагийн албаны Эдийн Засгийн гэмт хэрэгтэй тэмцэх газраас  прокурорын зөвшөөрөлтэй хэд хэдэн компаниудад нэгжлэг хийж, мөрдөн шалгах ажиллагаа явуулжээ. 

Тухайлбал, Эм Ди Си Пи гэх компани нь эрүүл ахуйн шаардлага хангаагүй, хүний эрүүл мэндэд хохирол учруулж болзошгүй их хэмжээний махыг худалдсан, түгээсэн, экспортод гаргасан байж болзошгүй хэрэгт мөрдөн шалгах ажиллагааг явуулж байна. 

Мөн ХКҮ компани нь экспортод мах гаргах квот буюу зөвшөөрлөө Эм Ди Си Пи компанид ашиглуулсан, зарсан байж болзошгүй асуудлыг тогтоохоор мөрдөн шалгах ажиллагаа хийгдэж байгаа аж. ХКҮ компани нь Х.Баттулгын Баянгол зочид буудалд байрладаг бөгөөд Эм Ди Си Пи компанийн байрнаас ХКҮ компанийн хаяг, шошготой их хэмжээний чанарын шаардлага хангаагүй мах илэрсэн байна. 

Түүнчлэн Мах Импекс компанийн байранд байрлах ХКҮ компанийн үйлдвэрийн оффис, агуулахын байруудад мөн нэгжлэг, үзлэг хийж, санхүүгийн баримт материалыг түр хураан авсан талаар эх сурвалж мэдээллээ. 

Цагдаагийн байгууллагаас Эм Ди Си Пи компанийн захирал БНХАУ-ын иргэн Сийлэн болон бусад албан тушаалтнуудыг, ХКҮ компанийн албан тушаалтнуудаас мэдүүлэг авах зэрэг ажиллагаанууд хийгдэж байгаа аж.