ЦЕГ-ын даргын санаачилгаар 2022 оныг хүүхдийг гэмт хэрэг зөрчлөөс урьдчилан сэргийлэх, аюулгүй байдлыг хангах чиглэлд онцгойлон анхаарч, хүүхдийн эрхийг хамгаалах өдөрт зориулан 6 том компанит ажлыг зохион байгуулж байгаа билээ. 

Энэ жилийн хувьд цагдаагийн байгууллагаас олон улсын хүүхдийн эрхийг хамгаалах өдөрт зориулан “ХҮҮХЭД ТАНЫГ ХАМГААЛЬЯ” уриан дор тэмдэглэн, хүүхдийг эрхийг хамгаалах чиглэлээр маш олон төрлийн арга хэмжээнүүдийг зохион байгуулан ажиллаж байна. Үүний нэг нь өнөөдөр Төв цэнгэлдэх хүрээлэнд  зохион байгуулж буй цагдаа, дотоодын цэргийн байгууллагын үйл ажиллагааг хүүхэд, багачуудад таниулах, сурталчлах ажлын хүрээнд “ХҮҮХЭД ТАНЫГ ХАМГААЛЪЯ” нэгдсэн арга хэмжээ байлаа.

Арга хэмжээнд ХЗДХ-ийн сайд Х.Нямбаатар, ГХУСАЗЗ-ийн дарга Л.Нямгэрэл, ЦЕГ-ын дарга, дотоодын цэргийн командлагч Ж.Болд, ЦЕГ-ын Тэргүүн дэд дарга Ц.Ням-Очир,  Дэд дарга О.Амарсанаа, НЦУГ-ын дарга Р.Отгонжаргал, ЦЕГ-ын зөвлөлийн гишүүд, цагдаа, дотоод цэргийн байгууллагын бүх харьяа газрын удирдлагууд, алба хаагчид болон хамтран ажилладаг байгууллагуудын төлөөллүүд оролцлоо.

Энэ үеэр МУГЖ, дуучин Т.Ариунаа ая дуугаа өргөж, цагдаагийн Сүлд чуулгынхан бүрэн хэмжээний тоглолтыг үзүүлж, хүүхэд багачуудад цагдаагийн автомашины үзэсгэлэн, гардан тулаан, албаны нохойн үзүүлбэр, агаарын буулт зэрэг олон сонирхолтой үзүүлбэрийг үзэж сонирхохоос гадна урлаг, соёлын болон спортын олон хөгжөөнтэй уралдаан, тэмцээнүүдэд оролцож,  цагдаа ах, эгч нартайгаа нэг өдрийг хөгжилтэй, сонирхолтой, хэзээ ч мартагдахааргүй дурсамж бүтээн өнгөрүүллээ. Түүнчлэн цагдаа, дотоодын цэргийн бүх алба, хэлтэс хүүхдэд ажил мэргэжлээ сурталчлах хэсгүүдийг төв цэнгэлдэх хүрээлэнгийн гадна талд байршуулсан нь мөн хүүхдүүдийн сонирхолыг ихэд татаж байв. 

"Цагдаа, дотоодын цэргийн байгууллагаас хүүхэд, багачууддаа зориулан үзэсгэлэн, урлаг, соёл, спортын уралдаан, хөгжөөнт тэмцээнүүд амжилттай зохион байгууллаа"

"Хүүхэд таныг хамгаалья" нэгдсэн арга хэмжээг нээж ЦЕГ-ын дарга, Дотоодын цэргийн командлагч, Хошууч генерал Ж.Болд хэлсэн үгэндээ "Та бүхэнд энэ өдрийн амрыг эрье. Цагдаа, дотоодын цэргийн байгууллагаас олон нийт, хүүхэд, багачууддаа зориулан цагдаагийн байгууллагын үйл ажиллагааг сурталчлах, хүүхдүүдийн төлөө хэрхэн ажиллаж, аюулгүй байдлыг нь хамгаалахын төлөө хичээн зүтгэдэгээ ойлгуулах, таниулах зорилгоор компанит ажлуудыг зохион байгуулж байна. ЦЕГ-аас хүүхдийн эсрэг гэмт хэргийг бууруулах, урьдчилан сэргийлэх чиглэлээо төрийн болон төрийн бус, олон улсын байгууллагуудтай тогтмол идэвхтэй хамтран ажиллаж байна. Бид өнгөрсөн хугацаанд хүүхдийн төлөө 10-аад нэгдсэн арга хэмжээг зохион байгуулж, ЕБС-ийн 120 мянган сурагчдад эрх зүйн ойлголт, мэдлэг өгөх, гэмт хэргээс урьчдилан сэргийлэх сургалтыг тогтмол зохион байгуулснаар хүүхдийн гэмт хэргийн илрүүлэлт 6.4 хувиар өсөж, сургуулийн орчинд гэмт хэрэг бүртгэгдээгүй эерэг үр дүн гарсан байна.

Мөн цагдаагийн байгууллагаас хүүхдийн мэдээллийн нэгдсэн санг үүсгэж, эрсдэлтэй нөхцөлд амьдарч буй 3000 гаруй хүүхдийг илрүүлэн бүртгэлд оруулнаар хүүхдийн эсрэг нуугдмал гэмт хэрэг зөрчлийн илрүүлэлт 25 хувиар өссөн байна. Түүнчлэн ЦЕГ-аас хүүхдэд хандах томчуудын хараа хяналтыг сайжруулах зорилгоор 192 байгууллага дээр эцэг, эхийн зөвлөлийг байгуулж, school police -г 514, өсвөрийн сэргийлэгчийг 76 ЕБС дээр байгуулж, 214 иргэнийг хүүхэд хамгаалагчаар ажиллуулж байна. Цаашид хүүхэд, багачуудыг эрүүл, аюулгүй орчинд амьдрахад чиглэсэн олон талын үйл ажиллагааг хэрэгжүүлэхэд бүхий л хүч чадлаа дайчлан ажиллах болно. Цагдаагийн байгууллага үргэлж хүүхэд, багачуудынхаа төлөө ажиллах болно. Энд хуран цугласан эцэг, эхчүүд, хүүхэд багачууддаа олон улсын хүүхдийн эрхийг хамгаалах өдрийн мэнд хүргэе" гэлээ. 

Энэ үеэр ЦЕГ-ын Тамгын газрын дарга, цагдаагийн хурандаа П.Оростогоо "Өнөөдөр буюу 06 дугаар сарын 01-ний өдөр цагдаа, дотоодын цэргийн байгууллагаас хүүхэд, багачууддаа зориулан үзэсгэлэн, урлаг, соёл, спортын уралдаан, тэмцээн зэрэг олон талын арга хэмжээг Төв цэнгэлдэх хүрээлэнд зохион байгуулж байна. Энэ арга хэмжээг ялангуяа эцэг, эхчүүдэд хүүхдийн эрхийн талаар боловсрол олгох зорилготой юм. Яагаад гэвэл эцэг, эх, асран хамгаалагчид эрх зүйн боловсрол муутайгаас болоод хүүхдийн эрх зөрчигдөх, улмаар гэмт хэргийн хохирогч болох, гэмт хэрэгт холбогдох их байдаг. Өнөөдөр энэ арга хэмжээ цаг үеэ олсон нь харагдаж байна. Хүүхдүүдэд өнөөдрийн үзүүлбэр, хөтөлбөрүүд их таалагдаж байгаа талаар эцэг, эхчүүд нь мөн сэтгэгдлээ илэрхийлж байна. Хүүхдүүд цагдаагаас айх биш, тэднээс дэмжлэг туслалцаа чөлөөтэй авдаг, ажил мэргэжлийг нь ойлгодог, хамтдаа аливаа эрсдэлээс сэргийлдэг байгаасай хэмээн хүсэж байна. 

Өнөөдрийн өдөрлөгөөр Онцгой байдлын ерөнхий газрын шүхэртэй үзүүлбэр, “Ногоон гэрэл, цагаан шугам” тэмцээнийг оролцогч хүүхдүүдийн үзүүлэх тоглолт, хүүхэд, багачуудад зориулсан урлагийн тоглолт, Дотоод хэргийн их сургуулийн сонсогчдын гардан тулааны үзүүлэх тоглолт, Цагдаагийн байгууллагын албаны нохойн үзүүлэх тоглолт, гар зураг, буухиа, дугуйн уран жолоодлого, дартс, олс таталт  зэрэг хөгжөөнт тэмцээнүүд амжилттай боллоо. Өнөөдрийн арга хэмжээг зохион байгуулсан  Цагдаагийн байгууллагын нийт бие бүрэлдэхүүн, алба хаагчид, тэдний ар гэрт болон бяцхан үрсүүдэд баярын мэнд хүргэе." гэв.

"Хүүхэд өөрийгөө болон найз нөхдийнхөө эрхийг хүндэтгэх, аливаа эрсдэлээс хамгаалах, урьдчилан сэргийлэх  ойлголттой боллоо"

ЦЕГ-ын Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтсийн дарга, цагдаагийн хошууч Э.Баярбаясгалан “Цагдаагийн байгууллагаас 2021 оноос хүүхдийг гэмт хэргээс урьдчилан сэргийлэх, хүүхдийн эсрэг гэмт хэрэгтэй тэмцэх зорилгоор  200 гаруй мэргэжилтний орон тоог батлаж өгсөн. Өнөөдөр цагдаагийн байгууллагад хүүхдийн эсрэг гэмт хэрэгтэй тэмцэх чиглэлээр 210 гаруй  алба хаагч, “Хүүхдийг эсрэг гэмт хэрэг, гэр бүлийн хүчирхийлэлтэй тэмцэх” хэлтэс үйл ажиллагаагаа явуулан ажиллаж байна. 

Цагдаагийн байгууллага хүүхдийн эсрэг гэмт хэрэгтэй тэмцэх ажлыг тухайн цаг үетэйгээ уялдуулаад зохион байгуулдгаар ихээхэн онцлогтой үр дүнтэй болдог. Олон улсын хүүхдийн эрхийн хамгаалах өдөр угтан “ХҮҮХЭД ТАНЫГ ХАМГААЛЪЯ” нэгдсэн арга хэмжээг зохион байгуулан ажиллаж байна. Үүний нэг нь өнөөдрийн энэхүү арга хэмжээ юм.

Мөн Ахиллис Монголиа ТББ-тай хамтран тусгай хэрэгцээт болон энгийн 500 гаруй хүүхдийн хамтарсан “БАГАЧУУДЫН ХӨГЖИЛТЭЙ ГҮЙЛТИЙН ТЭМЦЭЭН”-ийг энэ оны 05 сарын 22-ны өдөр Үндэсний цэцэрлэгт хүрээлэнд зохион байгууллаа. Уг гүйлтийн тэмцээнд цагдаагийн байгууллагаас 60 гаруй алба хаагчид дэмжин ажиллаж, аюулгүй байдлыг нь хангах, шаардлагатай хүүхдүүдэд хөтөчөөр оролцох, хамт гүйх, аюулгүй байдлыг хангах, мөн хөгжөөн дэмжиж урлагийн тоглолт, үзүүлбэрийг бэлтгэн оролцсон. Энэ нь цагдаагийн байгууллага  бүх хүүхдүүдэд эрх тэгш хандах хандлагыг түгээх зорилготой юм.

Түүнчлэн ЦЕГ-ын даргын тушаалаар Улаанбаатар хотын Ерөнхий Боловсролын 194 сургуулийн сурагчдад цагдаагийн байгууллагын 194 удирдах ажилтнууд “Хүүхдийн эрхийг хамгаалах, гэмт хэрэг зөрчлөөс урьдчилан сэргийлэх” сэдэвт уулзалт, сургалтыг энэ оны 05 дугаар сарын 23-27-ны өдрүүдэд ахлах болон дунд ангийн нийт 13017 сурагчдын дунд зохион байгууллаа. Мөн “Өсвөрийн сэргийлэгч” бүлгэмийн үйл ажиллагаатай танилцан, санал хүсэлтийг нь сонсож, бусдыг манлайлсан 244 сурагчдад “Талархал” гардуулсан. Энэ нь хүүхэд өөрийгөө болон найз нөхдийнхөө эрхийг хүндэтгэх, аливаа эрсдэлээс хамгаалах, урьдчилан сэргийлэх ойлголтыг өгөх, цагдаагийн байгууллагад хэрхэн хандаж тусламж авах зэрэг олон талын ойлголттой болсон. Бүх эцэг, эхчүүд хүүхдээ хайрладаг, ярилцдаг байгаасай гэж хүсэж байна.” хэмээлээ.