Энэ сарын 16-ны өдрийн 20.00 цагийн орчим БЗД-ийн аравдугаар хороонд, Амгалан захын урд замд Toyota Corolla Fielder маркийн автомашины жолооч Г, Toyota Premio маркийн авто машины жолооч Б, Toyota Prius маркийн автомашины жолооч Ц, Nissan Note маркийн автомашины жолооч О нар холбогдсон 4 автомашин мөргөлджээ.

Ослын улмаас жолооч, зорчигч гурван хүн гэмтсэн байна. Цагдаагийн байгууллагаас хэргийн газар үзлэг хийж, шалгалтын үйл ажиллагааг тус албаны Мөрдөн шалгах газрын Мөрдөн шалгах хэлтсээс явуулж байна.

Гэмтсэн гурван хүний хоёр нь 3 болон 5 насны хүүхдүүд байжээ. Осолд холбогдогч жолооч Г согтууруулах ундааны зүйл хэрэглэсэн, согтолтын зэргийг шалгахад 1.94% согтолттой байжээ.

Хөдөлгөөнд оролцогч та бүхэн Замын хөдөлгөөний дүрмийг баримтлан өөрийн болон бусдын аюулгүй байдлыг хангаж, бусад хөдөлгөөнд оролцогчдод хүндэтгэлтэй хандаж, аюултай нөхцөл үүсгэхгүйгээр замын хөдөлгөөндөө оролцоно уу.

Бидний буруутай үйлдлээс үүдэн хүний амь нас, эрүүл мэнд хохирох ёсгүй. Ялангуяа ирээдүй болсон хүүхдүүд маань хохирогч болж байгааг анхаарна уу хэмээн Тээврийн цагдаагийн газраас анхааруулав.