"Иргэд олон нийттэй харилцах 11-11" төвд ХХААХҮ-ийн сайд З.Мэндсайхан ажиллалаа. Тэрбээр 20 гаруй иргэнтэй биечлэн уулзаж, мөн утсаар иргэдийн санал гомдолд хариулт өглөө.

Иргэдийн зүгээс хөдөө аж ахуйг дэмжих хөнгөлөлттэй зээлд хэрхэн хамрагдах, хаврын тариалалтын бэлтгэл ажил, жижиг дунд үйлдвэрлэл эрхлэгчдийн өмнө тулгамдаж байгаа асуудлаар түлхүү санал хүсэлтээ илэрхийллээ.

Мөн “Монголдоо сайхан амьдаръя” жагсаалд оролцсон залуусын төлөөлөл биечлэн уулзаж, гол нэрийн бараа бүтээгдэхүүний үнийн өсөлт болон Засгийн газраас өргөн барьж, УИХ-аар батлуулсан Гол нэрийн бараа бүтээгдэхүүний үнийн өсөлт, хомсдолоос сэргийлэх тухай хуулийн хэрэгжилт ямар байгаа талаар асуулт тавилаа.

Өнгөрсөн сард 11-11 төвд хүнс, хөдөө аж ахуйн салбартай холбоотой 148 санал гомдол ирснээс 132-ийг нь шийдвэрлэсэн юм.