Газрын мэдээллийн цахим системд бүртгүүлэх хугацааг он дуустал сунгалаа. Нөхөн бүрдүүлэх ажлын хугацаа дуусах дөхсөнтэй холбогдуулан аймаг, нийслэлийн газрын албанд иргэд олон нийтийн хандах ачаалал үүссэнтэй холбогдуулан хугацааг 2022 оны арванхоёрдугаар сарын 31-нийг хүртэл сунгажээ. Мөн кадастрын мэдээллийн системд нэмэлт хөгжүүлэлтийг гүйцэтгэж иргэн, хуулийн этгээд www.egazar.gov.mn системээс “Өөрийн газраа кадастрын мэдээллийн санд бүртгүүлэх хүсэлт”-ийг илгээх боломжийг бүрдүүлсэн байна.

Энэ нь иргэн, хуулийн этгээдийн нэр дээр эрх бүхий этгээдийн шийдвэрээр олгогдсон газрын гэрээ, гэрчилгээ холбогдох материал байгаа бол www.egazar.gov.mn системд бүртгэлтэй эсэхийг шалгаж, хэрэв мэдээлэл байхгүй бол цахим хүсэлтээ илгээх юм. Газрын албаны мэргэжилтэн цахим хүсэлтээр ирүүлсэн материалд хяналт тавьж өргөдөл үүсгэн нөхөн бүрдүүлэх зарчмаар мэдээллийн санд бүртгэх боломжийг бүрдүүлээд буй. Нөхөн бүрдүүлэлтийн ажлын хүрээнд Монгол Улсын хэмжээнд 68,172 нэгж талбарыг кадастрын мэдээллийн санд бүртгээд байна гэж Газар зохион байгуулалт, геодези, зураг зүйн газраас мэдээллээ.