Монгол Улсад Дотоодын цэрэг үүсч хөгжсөний түүхт 100 жилийн ой энэ жил тохиож байгаа билээ. Ойн хүрээнд Зэвсэгт хүчин, Хилийн цэрэг, Дотоодын цэргийн анги байгууллагад цэргийн жинхэнэ алба хааж буй хугацаат цэргийн алба хаагчдын дунд “Шатар”-ын тэмцээнийг өнөөдөр буюу 02 дугаар сарын 25-ны өдөр зохион байгуулж байна. 

Тус тэмцээнд Зэвсэгт хүчин, Хилийн цэрэг, Дотоодын цэргийн 12 анги, байгууллагын 64 алба хаагч мэдлэг чадвараа сорин оролцож байна. 

Тэмцээний нээлтэнд Дотоодын цэргийн штабын дарга, хурандаа Р.Чингис, Зэвсэгт хүчний Жанжин штабын Ажиллагааны удирдлагын газрын хэлтсийн дарга, хурандаа Ч.Батсайхан, Хил хамгаалах ерөнхий газрын Хяналт-шинжилгээ, үнэлгээ, дотоод аудит эрхэлсэн дэд дарга, хурандаа П.Мөнх-Эрдэнэ болон бусад албаны төлөөллүүд оролцлоо.

Тэмцээнийг нээж Дотоодын цэргийн штабын дарга, хурандаа Р.Чингис хэлсэн үгэндээ "Монгол Улсад  Дотоодын цэрэг үүсэж хөгжсөний түүхт 100 жилийн ой энэ онд тохиож байгаатай холбогдуулан төрийн цэргийн байгууллагуудын хамтын ажиллагааг өргөжүүлэх зорилгоор Зэвсэгт хүчин, Хилийн цэрэг, Дотоодын цэрэгт цэргийн жинхэнэ алба хааж байгаа хугацаат цэргийн алба хаагчдын дунд “Шатар”-ын тэмцээнийг зохион байгуулж байна. Шатар тоглох нь ой тогтоолтыг сайжруулж, оюуны чадавхыг хөгжүүлэн бүтээлч чадварыг нэмэгдүүлдэг гэдгийг эрдэмтэд нотолсон байдаг. Та бидний гүйцэтгэж буй үүрэг ихээхэн онцлогтой бөгөөд алба хаагчдаас оюун санааны өндөр бэлтгэлтэй байхыг цаг ямагт шаарддаг, энэ ч утгаараа энэ спортоор алба хаагч бүр зайлшгүй хичээллэх хэрэгтэй. Бид цаашид алба хаагч, цэргүүдийнхээ ур чадварыг нэмэгдүүлэх тал дээр илүү анхаарч ажиллана" гэлээ.