Монгол Улсын Ерөнхийлөгчийн Байгаль орчин, ногоон хөгжлийн бодлогын зөвлөх Ц.Пүрэвхүү өнөөдөр Ерөнхийлөгчийн тамгын газрын дарга Я.Содбаатарт ажлаас чөлөөлөгдөх өргөдлөө өгсөн байна. Тэрбээр 2021 оны долдугаар сард Ерөнхийлөгч У.Хүрэлсүхийн зөвлөхөөр томилогдсон юм.

Өмнө нь “Утааны эсрэг аав ээжүүд” ТББ-ын тэргүүнээр ажиллаж байхдаа утааны эсрэг маш их тэмцэж байсан тэрбээр албан тушаалд томилогдоод таг чиг болсон тул олон нийтийн зүгээс Ц.Пүрэвхүүгээс хариуцлага нэхэх болсон. Гэвч "утааны эсрэг тэмцэх ажил бол Засгийн газар нийслэлийн удирдлагуудын хийх ажил. Би бол өөрийн ажлын байрны тодорхойлолтод тохирсон ажлаа хийж байгаа" хэмээн хариулсан нь олон нийтийн дургүйцлийг нэлээд хүргэсэн билээ. Сүүлийн хэд хоног шүүмжлэл, хариуцлага нэхсэн олон нийтийн үйлдлийн хариуд тэрбээр албан тушаалаа өгөхөөс өөр аргагүйд хүрсэн бололтой.