Үүрэгт ажилдаа хариуцлагагүй хандсан гэх үндэслэлээр Байгаль орчин, аялал жуулчлалын сайд Н.Уртнасан болон дэд сайд Ц.Батбаяр, Төрийн нарийн бичгийн дарга Д.Ганболд нарыг чөлөөлөв. Сайдын багийг огцоруулсан нь зөвхөн утааны асуудал ч биш. Н.Уртнасантай Н.Уртнасангүй утаа байсаар байх болно. Тэгэхээр “үүр эвдэх” нэгэн ажиллагааг Засгийн газар эхлүүлэв.

Сайдын “Их гал түлж болохгүй. Утаа ихсэж байна. Дрон нисгэж, утаа их гаргаж байгаа айл өрхүүдийг хянана. Түүхий нүүрсийг их хэмжээгээр түлж байгаа нь утаа ихсэх шалтгаан болж байна” гэх зэрэг үйлдлүүд нь иргэдээ бүү хэл өөрсдөө доромжлуулаад зогсохгүй Л.Оюун-Эрдэнийн Засгийн газрын нэр хүндэд ноцтой халдсан хэрэг гэнэ . Одоогоор Л.Оюун-Эрдэнийн Засгийн газрын нэр хүндэд ноцтой халдаж байгаа сайд бол Л.Халтар гэдгийг онцолж байна.

Тиймээс Зам, тээврийн хөгжлийн сайд Л.Халтарыг “туух”-аас өөр аргагүйг дуулгасан. Тэгээд ч өчигдөр болсон МАН-ын Удирдах зөвлөлийн хурал дээр Зам тээврийн хөгжлийн дараагийн сайдын асуудлыг хэлэлцээд өнгөрсөн байна. Нэгэнт МАН-ын Удирдах зөвлөлөөр шинэ сайдын нэр хэлцэгдсэн бол Л.Халтарын хугацаа дуусгавар болж байна гэсэн үг. Өчигдрийн Удирдах зөвлөлийн хуралдаан хэдийгээр Байгаль орчин, аялал жуулчлалын Дэд сайд, Төрийн нарийн бичгийн дарга нарын асуудлыг хэлэлцсэн ч яах аргагүй Зам, тээврийн хөгжлийн сайдын асуудал руу хальтирч ороод байсныг эх сурвалж хэлсэн. Тэгэхээр шинэ сайд ажлаа авахыг машид их яарч байна гэсэн үг. Тэгээд ч энэ Засгийн газраас 3-4 сайд явуулж байж засаг тогтвортой байх учраас тэдгээрийн тоонд гарцаагүй Л.Халтар сайд орчихоод байна. Нөгөө талаар эртний тохироо ёсоор Н.Энхбаяр ч өдөр шөнөгүй Зам, тээврийн яамыг нэхэж байгаа гэх.

Ядахад Л.Халтар сайдад огцрох шалтгаан мундахгүй бөгөөд шалтгаан нь маш амархан. Өнөөдөр ачаа тээврийн салбарт гарч байгаа гацааг тэр арилгахын төлөө явсангүй. Яваад ч хүч хүрсэнгүй. Ямар сайндаа арай дээрдүүлээд Шадар сайд С.Амарсайхан өөрөө явж байхав дээ. Гэвч нөхцөл байдал дээрдээгүй байна. Тэгээд ямар Л.Халтарын ажлыг Шадар нь, эсвэл Ерөнхий сайд нь өмнөөс нь хийлтэй биш явуулахаас өөр аргагүй. Тэгээд ч эх сурвалж зоригтой дуугарсан байх. За тэгээд Дархан, Улаанбаатар чиглэлийн замыг гацаасан гээд дурдаад байвал олон зүйл бий. Монгол Улсын зам тээврийн салбар ингэтлээ дор орж байсан түүх байхгүй. Гагцхүү Л.Халтар сайдын өнгөн дээр ийнхүү дампуурлаа гэдгийг зам тээврийн салбарынхан дуу нэгтэй батлаж байна.