Турк улс дотооддоо гарган авсан “COVID-19”-ийн анхны вакцин болох “Turkovac”-ыг пүрэв гаргаас тарьж эхэлнэ гэж тус улсын Эрүүл мэндийн сайд Фахреттин Кожа мэдэгджээ. Тэрбээр Анкара хотын эмнэлэгт уг вакциныг нэмэлт тунгаар тариулсныхаа дараа энэхүү мэдэгдэлийг хийсэн байна.

Эрүүл мэндийн яамны мэдээллээр, улсын хэмжээнд лхагва гарагт “COVID-19” халдварын 36684 тохиолдол илэрснээр халдварын нийт тохиолдлын тоо 9 402 083-т хүрчээ. Цар тахал дэгдсэнээс хойш тус улсад халдварын улмаас 82059 хүн нас барсан бол сүүлийн 24 цагийн хугацаанд 25638 хүн эдгэрсэн байна.

Туркийн эрх баригчид Хятадын “Sinovac” компанийн вакцинд яаралтай журмаар хэрэглэх зөвшөөрөл олгосноор тус улс энэ оны нэгдүгээр сарын 14-нөөс “COVID-19”-ийн вакцинжуулалтад олон нийтийг хамруулж эхэлсэн юм. Өнөөдрийн байдлаар улсын хэмжээнд 130.57 сая тун вакцин тарьснаас 56.86 сая хүн вакцины эхний тунд, 51.52 сая хүн хоёр тунд хамрагджээ.