УИХ-ын гишүүн Б.Дэлгэрсайхан Монгол Улсад урилгаар ажиллаж байгаа зам гүүрийн инженер БНХАУ-ын иргэнийг өчигдөр орой балмадаар зодож танхайрсан байна.

Тодруулбал, БНХАУ-ын инженер Чен Хо-г гишүүн Б.Дэлгэрсайхан “Теди” төвийн урд талын оффистоо дуудсан юм байна. Ажил хэргийн уулзалт болно хэмээн итгэсэн инженер Чен Хо, орчуулагч Ван Дү Мэг дагуулан өчигдөр орой 17.00 цагийн үед очжээ. 

Тэгтэл УИХ-ын эрхэм гишүүн Б.Дэлгэрсайхан инженер Чен Хог "Чи муу яагаад маскаа авдаггүй юм бэ" гэх шалтгаанаар хамар руу хэд хэд цохиж, хамрыг нь хугалан, шилбэ, тархи толгой руу нь өшиглөжээ.

Эх сурвалжийн мэдээлж буйгаар хохирогчийн биеийн байдал хүнд ГССҮТ-д хүргэгдэж эмнэлгийн тусламж үйлчилгээ авч оёдол тавиулжээ. Биеийн байдал хүндэвтэр байгаа юм байна. Мөн шинжилгээ өгсөн байгаа бөгөөд өнөөдөр хариу нь гарах юм байна.

Хэргийн тухайд орчуулагч эмэгтэй цагдаад дуудлага өгсөн бөгөөд удалгүй Чингэлтэй дүүргийн Цагдаагийн хэлтсийн жижүүрийн бие бүрэлдэхүүн, ахлагчаар нь ахмад Н.Гантулга ирсэн байна. Цагдаагийн байгууллагаас энэхүү хэргийг шалгаж байгаа бөгөөд мөрдөн байцаалт эхэлсэн байна гэв.

Тэгвэл УИХ-ын гишүүн Б.Дэлгэрсайханы энэхүү балмад хэрцгий явдлыг хохирогчийн ажтлладаг Хятадын компани зүгээр өнгөрөөхгүй, өнөөдөр хэвлэлийн бага хурал хийнэ гэдгээ ч мэдэгджээ.

Мөн түүнчлэн УЕП, Монгол Улсад суугаа БНХАУ-ын онц бөгөөд бүрэн эрхэт Элчин сайд, Гадаад Хэргийн яам, ЦЕГ, УИХ-д албан тоот бичиг явуулсан байна.