Одоогоос жил гаруйн өмнө буюу өнгөрөгч 2020 оны долоодугаар сарын 31-ний өдөр Налайх дүүрэг байрлах “Тэнгэрийн энерги” бясалгалын төвөөс 25 настай эмэгтэй О сураггүй алга болсон  хэрэг гарсан билээ.  Тухайн үед Онцгой байдлын газар, Цагдаагийн байгууллагаас хоёр сар гаруйн хугацаанд эрэн хайх ажлыг зохион байгуулсан ч үр дүнд хүрээгүй учир  эрэн хайх  ажиллагааг зогсоосон байдаг.

Тэгвэл өнгөрөгч 11-р сарын 11-нд эмэгтэйн цогцос Налайх дүүргээс олдсон байна. Цогцсыг хоёр метрийн гүн ухсан жорлонгийн нүхнээс гарган авч, сураггүй алга болсон гэх эмэгтэй О байж болзошгүй гэж үзэн шүүх шинжилгээний хүрээлэнд хүргүүлсэн.

Тус хэргийн талаар ЭЦА-ны Эрэн сурвалжлах хэлтсийн дарга, Цагдаагийн хурандаа н.Очгэрэл "Налайх дүүргээс олдсон цогцос нь иргэн О-гийнх болох нь баталгаажсан, ар гэрийнхэнд таниулсан байна. Шүүх эмнэлгийн дүгнэлт албан ёсоор гараагүй ч, задлангийн урьдчилсан дүгнэлтээр ил харагдах гэмтэл, шархи сорви байгаагүй гэх мэдээлэл байна." гэв.