Ардчилсан намаас өнөөдөр /2021.10.1/ төв талбайд “Одоо боллоо” жагсаалыг зохион байгуулж байна. Тус жагсаал 11:00 цагт эхэллээ. 2020-2021 оны сонгуульд үргүй зардал ихээр гаргаж эдийн засгийг хямралд оруулсан. Мөн Covid-19 цар тахлын үед төлөвлөлтгүй менежмент хийж хүний эрх чөлөө, аж ахуй нэгжийн эрх ашгийг боомилж буйг тэд эсэргүүцэж байгаа. Өнөөдрийн жагсаад жижиг дунд үйлдвэрлэл эрхлэгч, иргэд ирж, үзэл бодлоо чөлөөтэй илэрхийлэх боломжтой аж. 

Энэ үеэр УИХ гишүүн Д.Ганбат  “Иргэд Ардчилсан намыг нэгдээсэй, сэргээсэй, нийгэмд болж буй хууль бус зүйлстэй тэмцэж, цар тахлын хуулийг илтэд зөрчиж байгаа Л.Оюун-Эрдэнийн засгийн газарт хариуцлага тооцоосой гэж хүссэн учраас бид иргэдийнхээ захиалгаар өнөөдөр энэ талбайд үгээ хэлж эвлэлдэн нэгдэж байна. Монгол улс нэг нам, нэг хүний дарангуйлалд орж байна. Өнөөдөр өргөн хэрэглээний барааны үнэ  маш ихээр нэмэгдэж, ард иргэдийн хөдөлмөрлөх эрхийг боогдуулснаар төрөөс өгч буй жоохон халамжаар л иргэд амиа зогоож амьдарч байна.

Сүүлдээ иргэдийг хууран мэхэлж хүүхдийн мөнгийг талыг нь хадгаламж байдлаар өгнө гэж шилний цаанаас долоолгох асуудал яригдаж байгаа нь туйлын харамсалтай. МАН үнэхээр зүүний үзэл баримтлалтай нам мөн л юм бол Коронавирусын тархалт намжтал 2024 оныг дуустал ямар ч халамжийг зогсоож болохгүй. Өнөөдөр Монгол улсын гурван хүний нэг нь ядуу. Засгийн газар  эдийн засгийг сэргээх алхмуудаа хийхгүй бол хоёр хүний нэг нь ядуу болоход ойрхон байна.

МАН өөрсдөө иргэдийг бөөнөөр нь цуглуулж ЦАХИМ ҮНДЭСТЭН шоу хийгээгүй бол, энтертэйнмэнт засгийн газрыг байгуулаагүй бол, ард түмний үг хэлэх эрхийг хааж боогдуулаагүй бол өнөөдрийн жагсаал цуглаан болохгүй байх нөхцөл бүрэн байсан. Төв талбайд цугласан иргэд маань халдвар хамгааллынхаа дэглэмээ барьж оролцож байна”  гэв.