Чингэлтэй дүүрэгт энэ онд улс, нийслэл, дүүргийн төсвийн хөрөнгө оруулалтаар хийхээр төлөвлөсөн ажлууд бий.

Үүний нэг болох Нийслэлийн орон нутгийн хөгжлийн сангаас хэрэгжиж буй 900 ам.метр талбай бүхий тохижилтын ажлыг хийж дуусгажээ.

Тодруулбал, тус дүүргийн дөрөвдүгээр хорооны 35 дугаар байрны хойд талбай, зургадугаар хорооны 32, 47 дугаар байрны дундах талбайд тохижилт хийсэн байна. 

Тус хороодын автомашины зогсоолын хүрэлцээг сайжруулах, орон сууцны дундах хүүхдийн тоглоомын талбай, иргэдийн чөлөөт цагаа өнгөрүүлэх орчныг нэмэгдүүлэх хэрэгцээ шаардлагын хүрээнд 35 дугаар байрны хойд талбайд хүүхдийн тоглоом, чийрэгжүүлэх төхөөрөмж, явган хүний зам, иргэд амарч суух сандал зэргийг хийж, мод тарьжээ. 

Мөн 32, 47 дугаар байрны дунд явган хүний зам, авто зогсоолын талбайг тохижуулсан аж.

Тохижилтын ажлыг “Буяннэмэх интер” ХХК дөрвөн сарын хугацаанд гүйцэтгэн, иргэдэд хүлээлгэн өгөхөд бэлэн болжээ.