Яг одоо Эрүүгийн цагдаагийн алба болон Соёлын өвийн газраас сүүлийн үед гарч буй соёлын өвийн хулгай, хадгалалт хамгаалалтын асуудлаар мэдээлэл хийж байна. 

ШУУД ҮЗЭХ: 

ЦЕГ-ын Эрүүгийн цагдаагийн албаны III-р хэлтсийн тасгийн дарга, цагдаагийн хошууч С.Бямбадэлгэр:

2021 оны эхний найман сарын байдлаар соёлын өв, түүх соёлын эд зүйлсийг хулгайлсан долоон гэмт хэрэг гарсан. Үүнээс зургааг нь цагдаагийн байгууллага илрүүлэн, холбогдох этгээдүүдийг барьсан.

Одоо нэг хэрэг дээр нь ажиллаж байна. Нийт таван этгээд гурван аймаг, хоёр дүүргийн нутаг дэвсгэр дамжин зургаан төрлийн түүх соёлын дурсгалт зүйлийг хулгайлсан байсан.

Соёлын өвийг хулгайлсан таван этгээдийн хоёр нь өмнө нь хоригдож байсан бөгөөд өршөөлөөр суллагдсан. Эдгээр этгээд аялал зугаалгаар явах нэрийдлээр музей зэрэг рүү орж хулгайлах зүйлсээ судалдаг байна.

Музей, соёлын өв хадгалах газруудын харуул хамгаалалт сул байгаа нь хулгай гарах үндэс болж байна.

Аливаа иргэн өөрийн эзэмшдэг соёлын өвийг бүртгүүлэх ёстой. Үүнийг мэдэхгүй, бүртгэлгүй байгаагийн улмаас цагдаагийн байгууллагын ажилд хүндрэлд учирдаг.

Соёлын өвийн гэмт хэргүүд зохион байгуулалттай болсон. Мэдээж худалдан авагч, худалдаалагч байна. Тэднийг холбодог зуучлагч бий.  Энэ тал дээр бид олон улсын байгууллагатай харилцаж байна.

Соёлын өвийн газрын дарга Б.Даваацэрэн:

Энэ төрлийн гэмт хэргийг төрөөс арга хэмжээ авч зогсооно гэдэг тааруу. Тиймээс иргэд туслах хэрэгтэй. Орон нутаг дахь булш, хэрэгсүүрийг тонон дээрэмдэх гэмт хэргийг зогсоохын тулд иргэдийн оролцоо чухал.

Соёлын өвийн эсрэг гэмт хэргийг нэг хүн хүлээдэггүй. Улс орон цаашлаад дэлхий даяараа хүлээдэг.