УИХ-ын гишүүн Ж.Мөнхбат эхнэрээ зодсон гэх мэдээлэл тарсан бөгөөд энэ хэргийг Хан-Уул дүүргийн Цагдаагийн хоёрдугаар хэлтэс дээр шалгаж байгаа юм. Түүнчлэн УИХ-ын гишүүний мэдээллийг задруулсан гэх хэргээр цагдаагийн алба хаагчийг шалгаж байгаа юу хэмээх асуултанд Цагдаагийн Ерөнхий газрын Хэвлэл мэдээллийн төвийн дарга Б.Баатархүү "Хэргийн материал задруулсан хэргээр шалгаж байгаа нь үнэн. Тэгэхдээ УИХ-ын гишүүн Ж.Мөнхбат гишүүний хүсэлтээр шалгасан зүйл байхгүй. Яагаад гэвэл хавтаст хэрэгт авагдсан материал, олон нийтийн цахим сүлжээ, сайтуудаар гарсан. Нууцлал, аюулгүй байдал хаана алдагдав гэдэг дээр шалгалт хийгдэж байна. Мөрдөн шалгах ажиллагаа явагдаж байхад шүүхээр гэм буруутай нь тогтоогдоогүй байхад хавтаст хэрэгт байсан баримт, сэлтүүд цахим мэдээллийн сайтаар гарч байгаа дээр шалгалт хийхээс өөр арга байхгүй." хэмээлээ.