Хойд эцэг нь хүүхдийн хөлийг хугартал цохиж, хүнд гэмтэл учруулсан хэрэг гарчээ.

Иргэн Н нь гэр бүлийн хүчирхийлэлд өртсөн талаар цагдаагийн 102 дугаарын утас руу залган тусламж хүсжээ. Дуудлагын дагуу цагдаагаас очиход хойд эцгийнхээ зодуурын золиос болсон хүүхэд хүнд бэртсэн байсныг ГССҮТ-д хүргэсэн байна.

Тодруулбал, хүүхдийг энэ сарын 25-нд цагдаагийн байгууллагаас ГССҮТ-д авчирсан бөгөөд хөл нь хугарсан, толгой доргилттой хүнд гэмтэлтэй байсан учир тус эмнэлэгт хэвтүүлэн эмчилжээ. 

Эх сурвалжийн мэдээлж буйгаар тухайн хүүхэд жил гаруй хугацаанд гэр бүлийн хүчирхийлэлд байжээ.

Иймд цар тахлын улмаас хүмүүс гэртээ байгаа энэ үед иргэн, айл өрхүүд сонор сэрэмжтэй байж, хөрш айлд тань хүчирхийллийн шинжтэй дуу чимээ гарвал цагдаагийн байгууллагад мэдэгдэж, гэмт үйлдлийг таслан зогсооход хувь нэмэр оруулж иргэний журамт үүргээ биелүүлэхийг албаныхан анхааруулж байна.