Нийслэлийн Мэргэжлийн хяналтын газраас “Ой, ан, байгалийн ургамал түүж бэлтгэж байгаа байдалд урьдчилан сэргийлэх хяналт шалгалтыг хийж гүйцэтгэж байна. Хяналт шалгалтыг нийслэлийн ногоон бүсийн нутаг дэвсгэр болон нийслэлийн нутаг дэвсгэрт байрлах авто тээвэр шалган бүртгэх товчоод, төмөр замын вокзал, нисэх буудал, томоохон зах худалдааны төвүүдэд үйл ажиллагаа явуулж буй болон тэдгээрээр үйлчлүүлж буй иргэд, хуулийн этгээдүүдэд зохион байгуулж, байнгын хяналт, хөдөлгөөнт эргүүл гэсэн хэлбэрээр хийж гүйцэтгэж байна.

Өнгөрсөн онд хориотой ан агнуур, мод бэлтгэлтэй холбоотой 100 гаруй гэмт хэрэг болон зөрчлийн шинжтэй үйлдлүүд илрүүлсэн. Үүнд:
• Тарвага- 600 орчим ширхэг,
• Саарал чоно- 15 ширхэг,
• Шар үнэг- 20 ширхэг,
• Хярс үнэг- 5 ширхэг,
• Ойн зэрлэг гахай- 5 ширхэг,
• Халиун бугын чив- 5 ширхэг,
• Зэгсний зэрлэг гахай- 1 ширхэг,
• Алтайн хойлог шувууны мах- 5 ширхэг,
• Ятуу шувууны мах-2 ширхэг,
• Зохих зөвшөөрөлгүйгээр шувуу барьсан- 3 толгой идлэг шонхор,
• 10 толгой ногтруу, 223 толгой тагтаа
• Тул загас 5 ширхэг, бусад загас 71 ширхэг /зэвэг, монгол хадран/,
• Хонин арц- 2 удаагийн үйлдэл- 1.1 тн орчим,
• Мансууруулах төрлийн ургамал- 4 удаагийн үйлдэл- нийт 57кг орчим,
• Түлээний модны хууль бус бэлтгэл 3 зэрэг гэмт хэрэг, зөрчлийн шинжтэй үйлдлүүдийг илрүүллээ. Зохих зөвшөөрөлгүйгээр барьсан 3 толгой идлэг шонхор, 10 толгой ногтруу, 223 толгой тагтааг байгальд нь эргүүлэн тавьж хууль бус ан агнуураас урьдчилан сэргийлж ажиллалаа.

Мөн томоохон зах, худалдааны төвүүдэд ан амьтны гаралтай бүтээгдэхүүн худалдаалдаг 10 орчим иргэн чонын шагай, соёо зэрийг дуурайлган хийж, жинхэнэ мэтээр тайлбарлан худалдаалж байсан зөрчлийг илрүүлж, харъяаллын дагуу ШӨХТГ-т шилжүүлсэн.

Мансууруулах үйлчлэл бүхий байгалийн ургамал, халиун бугын 5 ширхэг чив, ховор ясан эвэр тээвэрлэж явсан, ховор амьтан болох зэгсний зэрлэг гахай, 5 ширхэг тул загас зөвшөөрөлгүйгээр түлээний мод бэлтгэсэн, гарал үүслийн гэрчилгээн дээр заасан хэмжээнээс хэтрүүлэн мод, модон материал тээвэрлэсэн хэргүүдийг тухайн дүүрэг дэх цагдаагийн хэлтэс, ЦЕГ-ын Мөрдөн байцаах албанд тус тус шилжүүлсэн.

Эдгээрээс зөрчил гаргасан нь тогтоогдсон 7 хуулийн этгээдэд нийт 3500000 /гурван сая таван зуун мянга/ төгрөгийн торгууль, 62 хүнд нийт 17450000 /арван долоон сая дөрвөн зуун тавин мянга/ төгрөгийн торгууль, нийт 65446000 /жаран таван сая дөрвөн зуун дөчин зургаан мянга/ төгрөгийн нөхөн төлбөр оногдууллаа.