Нийслэлийн онцгой байдлын газарт өчигдөр буюу дөрөвдүгээр сарын 26-ны өдрийн 11.00 цагт Богд уулын Энхтайваны аманд модон дотор хөрсний шар өвс шатаж байна гэх дуудлага иржээ. Улмаар гал түймэр унтраах, аврах 14 дүгээр ангийн бэлтгэл ээлжийн бүрэлдэхүүн дуудлагын дагуу галын голомтод очиж, нэмэлтээр 30, 65 дугаар ангийн бэлтгэл ээлжийн бүрэлдэхүүн ирэхээс гадна  иргэд, байгууллагууд сайн дураараа нэгдэж түймрийн цурманд оруулж, галыг бүрэн унтраасан юм.

Галыг унтраахын тулд ард иргэд гал түймэр унтраах аврах ангийн албан хаагчдад сайн дураараа туслахаар нэгдсэн. Эдгээр залуус дунд гадаад улсын иргэд ч байсан ба “Бид нэг дэлхийд амьдардаг шүү дээ” хэмээсэн билээ.

Харин тэр дундаа нэг илүү хүн байсан гээд сошиал орчинд шүүмжлэл гараад эхэллээ. Тэр хүн бол Кёкүшюзан Д.Батбаяр аж.

Д.Батбаяр нь барилга бариулж байсан залуусаа өөрийн техник, төхөөрөмжтэй аваачин туслалцаа үзүүлсэн хэмээн сайтын лайваар тодруулга өгч суусан юм. Байгалийн гамшгийн үеэр өөрийгөө сурталчилж шоу хийх ийнхүү оролдлого нилээдгүй иргэдийн шүүмжлэлийг дагуулж эхэлсэн бололтой.

Ташрамд дурдахад, УИХ-ын гишүүн асан, Кёкүшюзан Д.Батбаяр нарыг 32 тэрбум төгрөгийн залилангийн хэрэгт холбогдуулан шалгаж эхэлснээс хойш найман сарын хугацаа өнгөрчээ. Энэ хэрэгт Замын-Үүд чөлөөт бүсийн захирагч гэх Н.Болормаа, “Сайхан ордос туурь” ХХК-ийн захирал Б.Цэрэндорж нарыг холбогдуулан шалгасан байдаг. Кёкүшюүзан Д.Батбаяр, түүний гэргий Т.Баясгалан нарыг өөрсдийн болон хамаарал бүхий хүмүүсийнхээ байгуулсан компаниар дамжуулж дархан цаазат Богд хан уул болон Яармагийн дэнжид их хэмжээний газар авсан. Гэвч зориулалтын дагуу ашиглаагүй, орон сууцны хороолол барьсан, байгаль орчинд нөлөөлөх байдлын нарийвчилсан үнэлгээ хийлгээгүй, хууль зөрчсөн үндэслэлээр шалгаж байгааг эх сурвалж мэдээлж байсан. Тэгвэл ийнхүү газрын асуудлаар шалгагдаж байгаа хүн гэнэт газар шороондоо хайртай болох гэж дээ.