Эрүүл мэндийн дэд сайд Ж.Амарсанаа коронавирусийн халдвар гараад буй БНХАУ-ын Ухань хотод сайн дурын эмчээр ажиллахаар явах гэж буйгаа өчигдөр сошиалд зарласан. Цахим орчинд түүний нэхүү мэдээллийг ихэд дэмжсэн. Гэвч саяхан В, С вирусийн шинжилгээ хийж байсан 28 лабораториудаас 15 лаборатори чанарын шаардлага хангаагүй нь тогтоогдсон. Үүний нэгдүгээрт Эрүүл мэндийн дэд сайд асан Ж.Амарсанаагийн Хаппи веритас лаборатори бичигдсэн байдаг. Энэ нь олон нийтийг тэр дундаа Хаппи веритасаар үйлчлүүлсэн хүмүүсийн бухимдлыг ихээр төрүүлж, шинжилгээний буруу хариутай болж, эрүүл мэнд сэтгэл санаагаар нь хохироосон асуудал үүсчээ. 

“Хаппи веритас”  лаборатори ЭМДЕГ-аас зарласан нээлттэй сонгон шалгаруулалтад тэнцэж АНУ-д үйлдвэрлэсэн бүрэн автомат төхөөрөмжөөр иргэдэд оношилгоо шинжилгээ хийх хүсэлтээ ирүүлсэн. Хяналт шалгалтын явцад бүрэн автомат төхөөрөмжөөр иргэдэд үйлчлээгүй байж ЭМДС-гаас санхүүжилтээ авахдаа бүрэн автомат төхөөрөмжөөр оношилгоо хийсэн мэтээр мөнгөө нэхэмжилж санхүүжилтээ авч байсан нь илэрсэн. Ингэхдээ нэлээн олон даатгуулагчийн  шинжилгээг  хагас автомат төхөөрөмжөөр хийж байсныг тогтоосон. ЭМДС-гаас нийт 8715 даатгуулагчийн 876 сая 760 мянган төгрөгийн зардал нэхэмжилж авсан нь тогтоогдсон юм.

Эрүүл мэндийн салбарын Дэд сайдын хариуцлагатай албан тушаал хашиж байсан хүн өрийн хувийн лабораториар ийнхүү хариуцлагагүй үйлдэл хийчихээд өнөөг хүртэл уучлал гуйж, хариуцлага хүлээгээгүй байгаа аж. Өөрийн элэг нэгтэндээ ингэж хандсан хүн Ухань руу очиж харийн хүмүүсийн эрүүл мэндэд санаа тавина гэдэг юу л бол. Түүний попролт даанч бодит байдалтай нь нийцэхгүй байгаа нь дээрх үйлдлээс харагдаж байна. 

Ж.Амарсанаа нь сайн үйлс хийхийг хүссэн бол бүх нийтийн эрүүл мэндийн боловсролд хувь нэмрээ оруулах, хүнд хэцүү амьдралтай иргэддээ үнэгүй оношилгоо эмчилгээ хийх, ард иргэдийн эрүүл ахуй гээд олон асуудалд бодит хувь нэмрээ оруулах санхүүгийн болоод мэргэжлийн ур чадвар, нөөц боломж түүнд бүрэн бий. Гэвч тэр өнөөдрийг хүртэл дорвитой ажил хийгээгүй, намын гишүүнийхээ л үүргийг гүйцэтгэсэн билээ.